Komunidade Kailaku husu solusaun di’ak ba ponte Bulobu
BOBONARU, 04 Marsu 2026 (TATOLI)- Korrente bee-mota Marobo kontinua fó danu ba estrutura ponte Bulobu, iha área Samutaben, suku Manapa, postu administrativu Kailaku, munisípiu Bobonaru, maski foin mak halo normalizasaun.
Ponte referida ne’e Institutu Jestaun Ekipamentu Apoia no Dezenvolvimentu Infraestrutura (IGEADI) halo normalizasaun iha fulan kotuk, maibé ameasadu atu kotu totál tanba hela de’it ona espasu metru ida liu.
Komunidade Kailaku, Aleixo Afonso de Jesus, konfirma katak provizoriamente karreta labele asesu ponte ne’e tanba rai-mamar no monu.
“Agora karreta boot labele liu. Ha’u ohin dadeer mai ho motór liu más ta’uk, tanba husi okos rai kraik monu, husi leten mós monu, hela de’it klaran metru ida. Kuandu udan maka’as nia bele kotu totál”, nia informa ba jornalista sira, iha samutaben, kuarta-feira ne’e.
Xefe Suku Manapa, postu administrativu Kailaku, Zeferino Loco Bere, rekomenda ba Ministériu Obra Públika atu buka solusaun ida ne’ebé di’ak liu, tanba ponte refere tinan-tinan sempre hetan danus husi korrente bee-mota.
“IGEADI sempre hadi’a, más labele rezolve tanba sira uza de’it rai-henek ho jumbo ne’e para atu normaliza hodi karreta ultrapasa, maibé la dura. Udan mai aat liu, se bele iha kraik ne’e tau bronjong depois mak tau jumbo ho saku iha leten para bee ne’e sai husi leten”, nia sujere.
Koordenadór Infraestrutura Ministériu Obra Públika destakadu Mmunisípiu Bobonaru, Fernando de Fátima, konfirma katak iha tempu badak IGEADI sei halo normalizasaun emerjénsia ba ponte ne’e.
“Para provizoriumente ema bele asesu estrada no labele fó impaktu mós ba ponte ne’e hodi hein konstrusaun permanente ida,t anba ita hotu hatene estrada husi Mau-Mali bá Kailaku-Bilimau iha ona prosesu. Ita hein tan uitoan prosesu reabilitasaun estrada ne’e atu la’o ona, hori bainhira ne’e ita halo ona site visited iha terrenu”, nia dehan.
Maski ponte ne’e besik atu kotu maibé movimentasaun transporte hanesan motorizada la’o normál, ba kamioneta ne’ebé durante ne’e tula rai-henek ba-mai mak obrigadu tenke fila mamuk tanba liu la di’ak.
Notísia relevante: IGEADI halo levantamentu dadus ba ponte Bulobu ne’ebé ameasadu kotu
Jornalista: Sergio da Cruz
Editora: Maria Auxiliadora
