Komisaun Rekrutamentu ba Juíz STJ husu KSMJ Portugal disponibiliza juri
DILI, 24 Abríl 2026 (TATOLI)—Komisaun ba Rekrutamentu Juíz Supremu Tribunál Justisa (STJ) haruka ona karta ba Konsellu Superiór Majistratura Judisiária (KSMJ)Portugal atu disponibiliza sira-nia juíz ida bele sai juri ba rekrutamentu juíz ne’ebé atu asume kargu iha Supremu Tribunál Justisa (STJ).
“Ohin ami-nia Prezidente ko’alia atu prepara karta hodi haruka ba Konsellu Superiór Majistradu Judisiáriu Portugal hodi haruka sira-nia juíz ida bele mai sai juri ba rekrutamentu juíz sira ne’ebé atu tuur iha Supremu Tribunál Justisa,” Komisáriu ba Komisaun Rekrutamentu Juíz Supremu Tribunál Justisa, Pedro Camões, hateten ba Ajénsia TATOLI, iha Tribunál Judisiál Primeira Instánsia Dili, Sesta ne’e.
Notísia relevante : Komisaun Rekrutamentu ba Juíz STJ hahú halo serbisu
Nia relata, prosesu selesaun inklui ezame no verifikasaun dokumentasaun sira hahú ona, no komisaun iha esperansa atu hetan kandidatu di’ak.
“Tanba prosesu karta foin mak atu bá, ami iha esperansa di’ak liu na’in-haat ka na’in-lima serbisu bele la’o apartir Maiu,” nia informa.
Karta sei fó liuhusi Prezidente Parlamentu Nasionál, Maria Fernandes Lay, ne’ebé ho ekipa sei halo vizita kortezia bá Portugal, nune’e bele aproveita hato’o mós ba Konsellu Superiór Majistratura Judisiária.
“Mesajen ne’ebé ami simu husi Konsellu Superiór Majistratura Portugal, nia sei apoiu, laiha rezerva,” nia katak.
Jornalista : Natalino Costa
Editora : Julia Chatarina
