Autoridade Suku Afaloikai motiva agrikultór hasa’e produsaun ba PME
VIKEKE, 01 Abríl 2026 (TATOLI)—Xefe Suku Afaloikai, Postu Administrativu Uatulari, Munisípiu Vikeke, Cesário N. Pires, motiva agrikultór sira husi Suku Afaloikai hasa’e produsaun hare hodi fornese ba Programa Merenda Eskolár (PME), atu estudante sira konsume produtu lokál.
“Ohin loron programa merenda eskolár la’o ona, presiza produtu lokál sira hanesan ai-fuan, modo no foos. Uatulari liuliu iha ami-nia Suku Afaloikai ita iha natar ne’ebé barak. Tan ne’e, ha’u kakarak husu agrikultór sira hasa’e produsaun hare hodi fornese ba programa merenda eskolár, atu ita-nia oan sira konsume ita-nia produtu lokál rasik,” Cesário ba TATOLI iha Suku Afaloikai, Kuarta ne’e.
Autoridade komunitária ne’e ne’e hatutan, durante ne’e autoridade akompaña foos importadu mak fornese ba PME tanba produtu lokál hare kuantidade la sufisiente, entaun ba tinan ida-ne’e agrikultór sira tenke haka’as an servisu hodi hasa’e produsaun hare.
“Bainhira ita hasa’e ona produtu hare, agrikultór sira mós tenke kálkula ba presu. Presu labele karun liu. Se karun liu dalaruma ema sosa mós sei hanoin barak. Tan ne’e, presiza atensaun mós ba presu foos lokál, atu ema bele sosa,” Cesário tenik.
Suku Afaloikai eziste eskola Ensinu Báziku Sentrál (EBC-sigla portugeza) tolu (3) mak hanesan EBC 11 Nahedala, EBC Uatulari Antiga no EBC Haenaudere.
Jornalista: Vitorino Lopes da Costa
Editór: Xisto Freitas da Piedade
