Tribunál halo julgamentu ba kazu tranzasaun millaun $42 iha tinan 2024

DILI, 02 Marsu 2026 (TATOLI)–Tribunál Judisiál Primeira Instánsia Dili (TJPID), Segunda ne’e, halo julgamentu ba kazu transasaun osan ilegál ho montante millaun $42, ne’ebé Autoridade Seguransa halo apreensaun iha tinan 2024.

Iha audiénsia julgamentu, molok tama ba faze produsaun provas, defeza husi arguidu sira lamenta ho presenza husi asistidu na’in-haat ne’ebé nu’udar asistidu ba Ministériu Públiku (MP) ba kazu ne’e.

Defeza husi arguidu nigerianu ho inisiál USM, Pedro Camões, argumenta katak Estadu laiha prejuizu ruma iha kazu ne’e, maibé MP aprezenta asistidu na’in-haat hodi marka prezensa iha sala julgamentu.

Nune’e, José Pedro Camões, husu ba asistidu Soraya Marques ho nia kolega na’in-tolu atu aprezenta karta prokurasaun ba kazu ne’e no husu Tribunál nia legalidade ba asistidu na’in-haat ne’ebé akompaña MP.

Tanba ne’e, husu ba Tribunál atu konsidera no tetu jestaun sira molok kazu ne’e avansa ba julgamentu, hafoin rona razaun Defeza, Tribunál suspende hodi halo analiza ba rekerimentu defeza durante minutu 15 molok prezide julgamentu ba oin.

Tribunál halo analize no autoriza asistidu sira partisipa iha kazu ne’e tanba desde inísiu hahú husi Primeiru Interrogatóriu halo ona akompañamentu, tanba ne’e Tribunál nafatin admite hodi sira akompaña MP.

Iha audiénsia julgamentu, Tribunál deside rona uluk arguidu USN nia depoimentu.

Iha sala julgamentu, arguidu nigerianu USN deklara ba Tribunál katak nia husi Indonézia mai Timor-Leste liuhusi Batugade iha tinan 2024 no halo kontaktu ho arguidu FJFdS liuhusi DV hodi halo kooperasaun.

Arguidu koñese FJFdS liuhusi nia kolega sira, tanba ne’e momentu ne’ebá sira hasoru malu ho arguidu FJFdS hodi ko’alia kona-ba investimentu iha Timor.

Durante hasoru malu, arguidu FJFdS hateten katak disponível atu ajuda sira loke kompañia no momentu ne’e nia fó osan $1.000 ba arguidu FJFdS hodi selu kolen.

Notísia relevante : UPM tenke kontinua prevene fronteira marítima husi tranzasaun ilegál

Nune’e, USN no FJFdS konkorda atu loke empreza. Arguidu FJFdS mak rejistu atividade empreza iha SERVE ho naran Six One Comunitty Asia, Unipesoal, Lda.

Arguidu USN deklara, nia mak entrega dokumentu ba arguidu FJFdS no arguidu DV mak fó hateten ba nia katak sei hetan osan millaun $42. Nune’e iha momentu ne’e USN no DDSFF mak halo levantamentu ba osan iha Banku Mandiri ho montante millaun $3, ne’ebé osan ne’e balun atu selu ba arguidu USN nia kole no osan balun atu finasia atividade empreza ne’ebé sira loke iha Timor.

USN hateten, momentu halo levantamentu osan iha Banku Mandiri, nia ho arguidu na’in-tolu ho karreta ida no arguidu FJFdS hamutuk ho nia mak tama bá banku laran, enkuantu arguidu DV mak iha karreta laran, no osan ne’e arguidu USN mak ba foti sira halo levantamentu uluk ba millaun $3, enkuantu millaun $39 seidauk halo levantamentu.

Osan sira transfere husi Singapura mai Timor atu halo investimentu, maibé bainhira foin halo levantamentu ba osan sira ne’e, sira lori osan sira bá nia rezidénsia.

Nune’e, iha tuku 16:30 autoridade sira halo kedan apreensaun iha rezidénsia, Raikotu Komoro.

Hafoin rona deklarasaun, Tribunál deside muda ba loron seluk hodi rona tan arguidu sira seluk.

Akuzasaun

Tuir akuzasaun, arguidu USN no DV ho naturalidade husi nasaun Nigeria, hela iha Jakarta-Indonézia, maibé USN sai ona sidadaun Indonézia, arguidu MU no SPPD husi Flores-Indonézia, enkuantu arguidu sira seluk nu’udar timoroan.

Konforme informasaun, istória viajen husi Servisu Migrasaun Dili, arguidu USN no DV sempre tama no sai iha territóriu nasionál no maioria liu terrestre Motain-Batugade, hahú husi Fevereiru 2024 no últimu iha 24 Juñu 2024, sira-nia billete inklui akomodasaun hetan finansiamentu husi individuu ho naran Mike iha Jakarta-Indonézia.

Hosi arguidu sira-nia viajen tama no sai iha territóriu nasionál, konsege rekruta tan arguidu AJFdS, DdSFF no FJFdS, ne’ebé entre sira sempre mantein ka iha komunikasaun, ikus mai arguidu USN no DV orienta no fasilita osan $1.500 ba arguidu FJFdS ho objetivu atu rejistu empreza no loke konta bankária ba empreza iha Timor-Leste, hodi hala’o atividade transférensia fraudulente.

Iha loron 11 Jullu, arguidu FJFdS konsege rejistadu empreza iha SERVE ho naran Six One Comodities Asia, Unipesoal, Lda ba atividade fiktísiu ekonómika iha área konstrusaun sivil, instalasaun eléktrika, no arguidu FJFdS rasik sai nu’udar sósiu úniku no administradór ba empreza referidu.

Empreza Six One Commodities Asia, Unip.Lda, estabelese nia konta bankária iha Banku Mandiri – Dili iha loron 12 Jullu 2024 ho konta 601-00-0116141-6.

Kuandu empreza referidu estabelese ona, arguidu FJFdS entrega imediatu dokumentu no konta empreza Six One Comodities Asia, Unipesoal, Lda ba arguidu DV no USN hodi bele prepara sabotajen komunikasaun pur vial e-mail kontra empreza ENN LNG (Singapura) Pte.Ltd (ENN).

Tranzasaun

Enkuantu, empreza ENN LNG (Singapura) Pte.Ltd, estabelese nia atividade komérsiu kombustível no produtu relasionadu, inklui mós komersializasaun no faan gás naturál likuefeitu (LNG) no Six One Comodities Asia Pte. Ltd nu’udar parseiru komersiál ENN no empreza sira ho sede iha Singapura.

Relasiona ho atividade ne’e, iha loron 19 Outubru 2023, empreza ENN LNG (Singapura) Pte.Ltd no. Six One Comodities Asia Pte.Ltd estabelese akordu hodi asina kontratu lejítimu fa’an no sosa LNG prinsipál (MSPA), ne’ebé deklara katak Six One Comodities Asia Pte.Ltd sei fornese remesa (shipment) LNG ba dala-rua ba ENN,iha Maiu 2024 no iha Jullu 2024.

Fatura orijinál no fatura atualizada. Bazeia ba Master Sale and Purchase Agreement (MSPA) no Six One Comodities iha intensaun atu fornese ba ENN ba remesa iha loron 08 Jullu 2024 husi Seth Hacket Six one Commodities, relasionadu ho fatura orijinál hanesan deskreve iha númeru 10-14 husi akuzasaun. Iha Jullu ENN tenke selu mak ho montante $42.317.766,55.

Iha loron 07 Jullu 2024, Seth Hackett hósi Six One Comodities (uza enderesu e-mail ingops@61commodities.com) envia e-mail ba Tina husi ENN (xuvued@enn.cn) (“e-mail orijinal) e-mail ida ne’ebé mak anexa tiha fatura ida ba montante ida-ne’e ho nia prazu tempu mak 19 Jullu 2024 (fatura orijinál).

Iha e-mail orijinál ne’e, Seth Hackett hatama mós kopia enderesu e-mail sira seluk, sethhackett@61 commodities.com. ENN hatene katak enderesu e-mail, sethhackett@61 commodities.com ne’e uza mós hósi Seth Hackett no ida ne’e refletidu iha assinatura (sign-off) e-mail Seth Hackett nian, enderesu e-mail, sethhackett@61 commodities.com ne’e mós regularmente kopiadu tiha iha e-mail ne’ebé enviadu husi ingops@6Icommodities.com.

Iha loron 08 Jullu 2024, Tina hósi ENN (xuvued@enn.cn), envia e-mail ba sethhackett hósi Six One Comodities (ingops@6]commodities.com), ho kópia ba sethhackett@61 comodities.com. hodi husu ba nia katak prazu tempu loloos fatura nian mak tenke loron 22 jullu 2024.

Iha loron 08 jullu 2024-dadersan, Set Hackett hósi Six One Comodities (ingops@61commodities.com), hato’o kopia ba sethhackett@61 commodities.com. hodi fornese fatura atualizadu ho prazu data lolo’os mak 22 jullu 2024 (fatura atualizadu).

Iha loron 09 jullu 2024, Tina hósi ENN (xuyued@enn.cn) rekoñese fatura atualizada no konfirma katak ENN sei kontinua nafatin halo pagamentu tuir akordu ne’ebé iha, konforme fls 1632-1634, 1658-1662, 1666-1671, 1673 ho 1675-1678 ho 1680-1690.

Tranzasaun falsifikasaun, iha loron 15 Jullu tinan 2024, Tina hósi ENN simu e-mail no fatura falsifikadu hósi arguidu sira USN, DV, FJFdS  inklui ema ida identifikadu ho naran Mike, relasionadu ho tranzasaun refere ho meius fraude katak ne’e hanesan kontinuasaun ida hodi realiza (follow up) e-mail ho Pro.

Katak e-mail neʼebé envia husi enderesu e-mail falsifikadu ho naran sethhackett@61 commodities.com anexadu ho fatura falsifikadu.

E-mail falsifikadu ne’ebé envia hósi enderesu e-mail setkhacker@ commodities.com laos enderesu e-mail autorizadu ka lejítimu SIX ONE COMMODITIES nian no e-mail ida ne’e, diferente ho enderesu e-mail reál ka orijinál Seth Hackett nian sethhackett @ 6 [commodities.com, tanba iha únika letra ho “i” troka tiha ho letra “I” iha palavra Commodities no iha e-mail refere, assinatura seth Hackett nian mós replikadu.

Aleinde e-mail falsifikadu refere, inklui mós kopia husi e-mail fiktisia ka falsu sira seluk, neʼebé halo hanesan loloos ho e-mail orijinál Six One Commodities nian hanesan kellybezas@6lcommodities.com no Ingpos6commodities.com (subtitu letra “i” ba letra “I” iha palavra commodities).

Katak iha e-email falsifikadu ne’e, husu ba Tina husi ENN atu bele utiliza fatura falsifikadu ne’e hodi halo pagamentu.

Katak iha fatura falsifikadu ne’e, altera tiha dadus banku destinatáriu hósi ING BANK N.V, filiál Singapura ba fali Bank Mandiri, filiál Dili, Timor-Leste, ho númeru konta 601-00-0116141-6. (Konta Banku Mandiri), ne’ebé arguidu USN, DV ho FJFdS kria tiha ona iha Timor-Leste.

Iha fatura orijinál no fatura atualizada, Banku destinatáriu klaramente indikadu hanesan tuir mai.

Banku Korrespondente JPMORGAN CHASE BANK, NEW YORK, SWIFT/CHIPS, CHASSUS33/CHIPS UID 268442. Favoresimentu ING N.V. Filial Singapura (SWIFT:INGBSGSG) BANK, Ba Konta, Six One Commodities Asia Pte. Ltdl Númeru Konta: 011090604406

Iha fatura falsifikadu, ne’ebé altera banku destináriu, Banku Korrespondente JPMORGAN CHASE BANK, NEW YORK, SWIFT/CHIPS : CHASSUS33/021000021.

Favoresimentu Banku Mandiri, filiál Dili, Timor-Leste, ba Konta Six One Commodities Asia LDA. Númeru Konta: 601-00-0116141-6.

Katak data fatura falsifikadu altera tiha ba 15 Jullu 2024 no prazu data tempu nian iha fatura falsifikadu ne’e deklaradu tiha 22 Jullu 2024 hodi hamosu impresaun katak ida ne’e tenki forma parte husi troka e-mail auténtika ho loron 7-9 Jullu 2024 hanesan deskreve iha númeru 10-14 husi akuzasaun.

Katak, fatura falsifikadu halo tuir detalles sira seluk hósi fatura orijinál no fatura atualizada hodi halo ida ne’e hanesan original (auténtiku) hanesan tuir mai:

Fatura falsifikadu iha valor devidu hanesan iha fatura orijinál no fatura atualizadu, neʼebé ho montante $42.317.766,55.

Kuantidade fatura (3.469.295 MMBtu) no presu kontratu nian maka ($12.1978 MMBtu) hanesan fatura orijinál no fatura atualizadu.

Detalles remesa  inklui númeru kargu, naran roo, númeru dokumentu embarke, país no naran portu ba deskarregamentu nian ne’e mós hanesan ho fatura orijinál no fatura atualizadu.

Tanba fatura falsifikadu ne’e altera ona dadus bankáriu benefisiáriu nian, Tina (Xuvued@enn.cn) envia email ba sethackett@6lcommodities.com hodi konfirma katak transferénsia tenke halo ba iha konta Banku Mandiri no Tina mós husu atu fornese Standard Settlement Instruction (SSI), konforme fls 1663-1665 ho 1674.

Iha loron 16 Jullu 2024, sethhackett@61commodities.com envia e-mail ida hodi konfirma katak tenke halo transferénsia ba iha konta Banku Mandiri no aneksa tiha SSI falsifikadu.

Standard Settlement Instruction (SSI) falsifikadu ne’e aparentemente emitidu husi Banku Mandiri, Filiál Dili no asina husi ninia jerente jerál. Ida-ne’e mós fornese detallu sira tuir mai.

Banku korrespondente JPMORGAN CHASSE BANK, NEW YORK SWIFT/CHIPS :CHASUS33/021000021.Favoresimentu: Banku Mandiri, Dili Branch, (SWIFT:BMRIIDJA) ba Konta: Six One Commodities Asia LDA. Númeru Konta :601-00-0116141-6.

Standard Settlement Instruction (SSI) falsifikadu ne’e, deklara tiha empreza falsifikadu ida nu’udar benefisiáriu konta Banku Mandiri. Iha SSI falsifikadu refere, deklaradu tiha katak konta Banku Mandiri ne’e ninia posesaun maka ho naran “Six One Commodities Asia LDA naran kontraparte reál no auténtiku nian maka” Six One Commodities Asia Pte.Ltd.

Katak naran empreza falsifikadu refere, diferente ho naran kontraparte autêntiku ne’ebé so ba deit iha ninia dezignasaun ho “LDA” subtitui tiha “Pte Ltd”.

Bazeia ba fatura no SSI falsifikadu refere inklui manipulasaun dadus neʼebé arguidu USN, DV, FJFdS no ema identifikadu ho naran Mike konsege halo sabotajen ba komunikasaun liuhusi e-mail entre empreza sira iha Singapura, nomeadamente empreza ENN LNG, Pte. Ltd no empreza Six One Comodities Asia, Pte. Ltd.

Ho eskema Buissnes Email Compromise (BEC), sabotajen no manipulasaun ne’ebé deskreve ona iha leten, nune’e, iha loron 19 Jullu 2024, testemuña identifikadu ho naran Gao Shizen, reprezentante husi empreza ENN LNG, Pte. Ltd, husi nasaun Singapura, engañadu hodi konsege transfere erradamente osan ho montante $42.317.766,55, mai konta empreza ne’ebé arguidu sira kria ou seja empreza Six One Commodities Asia, Unip, Lda, ho númeru 601-00-0116141-6, Banku Mandiri sukursál Dili-Timor Leste ho statutu transferidu iha loron hanesan.

Bainhira hetan ona transferénsia fraudelentu, iha loron 22 Jullu 2024, haleu 14:10, arguidu FJFdS, USN, DV, DdSFF no AJFdS utiliza kareta rua ho marka Toyota Land Cruiser-Prado ho xapa matríkula A.20-308 ho Pajero Sport ho xapa matríkula A. 27-302, no hetan akompañamentu husi sasin Carlos Dozeno G Lay, Noe Luciano hodi diriji ba iha Banku Mandiri-Dili.

Bainhira to’o iha Banku Mandiri, arguidu FJFdS nu’udar sosiu úniku no mós hanesan administrador empreza Six One Commodities Asia, Unip Lda, através hósi cheque (AAM 915342), ne’ebé legáliza (assina) husi arguidu FJFdS konsege halo levantamentu osan iha konta empreza Six One Commodities Asia, Unip, Lda, ho montante $3.000.000.

Hafoin de arguidu FJFdS halo levantamentu ba osan ho referidu, arguidu sira konsege guarda iha saku ho kuantidade 3, no konsege transporta ho veikułu ho marka Mitsubishi Pajero, koor mutin, ho númeru matríkula A. 27-302 TL no kondús husi arguidu DdSFF no sira konsege kombina malu hodi han kalan hamutuk iha restaurante situada iha área Kristu Rei, ho obejtivu atu halo sirkulasaun hosi produtu ka bens ilísitu refere.

Depois de arguidu sira han kalan, arguidu VD konsege entrega osan ho montante $100.000 ba arguidu FJFdS, AJFdS no DdSFF atu sira fahe ba malu $50.000 ba arguidu DdSFF enkuantu $50.000 ba arguidu FJFdS, AJFdS.

Enkuantu arguidu SPD no MU hetan orientasaun husi ema ne’ebé ho identifikadu “X/ Mas Bro” iha orientasaun referidu, Mas Bro haruka arguidu sira atubele mai iha Timor-Leste hodi foti osan ne’ebé halo ona levantamentu hanesan deskreve no Mas Bro promote sei fó ba arguidu sira kada ema ho montante $5.000 no totál $10.000.

Bazeia ba orientasaun, iha loron 23 Jullu 2024, arguidu sira mai Dili. Timor-Leste liuhusi pontu entrada Mota-ain, Batugade no bainhira tama ona iha territóriu Timor Leste, arguidu SPD konsege telefone ba arguidu FCCO.

Atu aluga veíkulu hodi transporta arguidu SPD no MU husi Batugade bá-mai Dili ho montante $1.500, no arguidu FCCO konsege buka veíkulu aluguer no konsege hetan veíkulu ho marka Mazda Demio, númeru matrikula B. 11-738.

Iha loron 24 Jullu 2024, kuandu arguidu sira to’o iha Dili, mais ou menus haleu 18:00, arguidu SPD kontaktu através telemóvel ba arguidu NFNP  hodi fó permite ba arguidu atu entrega NFNP nia númeru telemóvel ba DV, hodi foti osan iha DV, ho nune’e NFNP konsege aseita hodi fo autorizasaun ba arguidu SPD entrega NFNP nia númeru telemóvel ba DV.

Iha loron hanesan, DV konsege kontaktu ba NFNP hodi kombina atu hasoru malu iha diresaun Quartel General, Hudi Laran, Bairo-Pite Dili, nune’e haleu 19h:30, DV konsege hasoru malu ho Nicolau iha Hudi Laran, Bairo-pite, hodi entrega osan iha pasta metan ida ba Nicolau ho montante $150.000.

Iha loron tuir mai, arguidu SPD kontaktu ba NFNP hodi husu tuir osan, nune’e haleu 18:30 NFNP konsege lori osan kompletamente iha pasta refere hodi entrega ba arguidu SPD iha Otel Pioner.

Hafoin Osan ho montante $150.000 iha arguidu SPD no MU nia pose, entertantu konsege kombina ho arguidu FCCO atu utiliza nia empreza Elegovers, Unip, Ida hodi transfere osan ba iha Indonézia.

Katak montante ne’ebé arguidu sira konsege halo transferénsia ba nasaun Indonézia. hanesan tuir mai iha loron 23 Jullu2024, arguidu USN halo transferénsia numeráriu dala-rua ba Indonézia liuhusi BRI Sukursál Timor-Leste, transferénsia dahuluk ho montante $45.000.00 ba benefisiáriu Edom Sunday Udoka, ho númeru konta bankária 118401021929505 iha BRI-Indonézia no transferensia daruak ho montante $80.000 ba benefisiáriu Marsivanti ho númeru 045223072024122149 iha BRI Indonézia, tuir mai arguidu USN orienta tan individuu ida ho naran Etik Prastika hodi fasilita transferénsia tan osan ho montante $8.500 ba benefisiáriu (rede arguidu sira-nian) ho naran Edom Sunday Udoka liuhusi nia konta bankáriu 118401021929505 BRI-Indonézia.

Ikus mai iha loron 24 Jullu 2024, arguidu USB halo tan transferénsia numeráriu dala-rua ba Indonézia, liuhusi BRI Sukursál Timor- Leste, ho transferénsia dahuluk ho montante $75.000 ba benefisiáriu Edom Sunday Udoka, númeru konta bankária 118401021929505 iha BRI-Indonézia no transferénsia daruak ho montante $125.000 ba arguidu nia konta rasik ho númeru 119301000267563 iha BRI Indonézia.

No iha loron 26 Jullu 2024, arguidu FFCO hetan orientasaun husi arguidu SPD  hodi fasilita halo transferénsia osan ho montante $30.000, destinadu ba iha Flores-Indonézia ba individuu ida ho naran Rahman Bunga ho númeru konta 162-340-712-6 BNI.

Totál Transferénsia ba nasaun Indonézia ho versaun hanesan tabela tuir mai:

Arguidu neʼebé halo tranferénsia montante transferénsi ba númeru konta benefisiáriu 23:

• Jullu 2024, USN, $45.000.00, 118401021929505 BRI-Indonézia, NoEdom Sunday Udoka,
• 23 Jullu 2024, USN, $80.000, BRI Indonézia 045223072024122149, Marsivanti
• 23 Jullu 2024. Etika prastika $8,500, 118401021929505 BRI-Indonézia. Edom Sunday Udoka
• 24 Jullu 2024, USN, $75.000, 118401021929505 BRI-Indonézia, Edom Sunday Udoka
• 24 Jullu 2024, USN, $125.000, 119301000267563 BRI-Indonézia, USN
• 26 Jullu 2024 SPD, $30,000, 162-340-712-6 BNI-Flores-Indonézia, Rahman Bunga

Iha loron 30 Jullu 2024, iha primeiru Interrogatóriu Judisiál, arguidu sira prontu atu devolve osan no liuhusi advogadu, rekere ba Tribunál atu foti objetu krime ka osan neʼebé arguidu FJFdS, DdSFF no AJFdS, rai iha sira-nia uma iha Fomentu no suku Dato, Munisípiu Likisá no pedidu refere, hetan deferimentu husi Tribunál.

Nune’e, Tribunál deside hodi diriji ba Likisá hodi foti osan ne’ebé arguidu FJFdS ho AJFdS rai subar iha uma hafoin foti tiha ekipa ho arguidu sira, kontinua fila mai Dili no diriji kedas ba iha arguidu DDSFF nia uma ne’ebé situada iha Fomentu-Dili hodi foti osan.

Bainhira Ekipa husi Tribunál ho arguidu sira to’o iha Fomentu-Dili, Polísia Sientífika Investigasun Kriminál (PSIK) hetan kontaktu husi servisu informasaun Likisá katak arguidu BFdS  hosi arguidu FJFdS ho AJFdS lori pasta kor metan ida nakonu ho osan neʼebé halo parte husi levantamentu antes no halai ba ai-laran maizumenus ho distánsia metru 500 husi nia uma, nune’e servisu informasaun no komunidade sira asegura kedas arguidu iha fatin akontesimentu, konforme fls 374-376, ho informasaun refere, PSIK diretamente bá iha fatin akontesimentu hodi halo kedas apreensaun ba osan ho montante $28.450.

Nune’e, montante ne’ebé PSIK no PNTL konsege halo apreensaun husi arguidu sira, nia pose osan ho totál $2.491.170, nune’e montante ne’ebé la konsege identifikania paradeiru ho montante $5.145.330  no fundus ne’ebé nia paradeiru iha Indonézia ho montante $363.500.

Entretantu osan ne’ebé hetan apreensaun no halo tranferénsia ba Indonézia hanesan deskreve iha leten, halo parte husi osan levantantu $3.000.000 husi orijin ilísitu ho totál $42.317.766,55.

Konsekuésia nesesariamente husi arguidu sira-nia konduta hanesan deskreve iha leten, hamosu tiha prejuízu patriomoniál ba empreza ENN LNG (Singapura) Pte Ltd ho montante $5.508.830.

Arguidu USN, DV, FJFdS, DdSFF, AJFdS, MU, SPD, NFNP no FCCO halo sira-nia hahalok ne’e, ho forma livre, deliberada no konsiente, arguidu sira hatene momoos katak, promove no serbisu hamutuk iha rede ka grupu kriminoza, prátika krime hodi hetan diretamente ka indiretamente benefísiu ka vantajen ruma, ne’e lei bandu, mezmu nune’e arguidu sira atua nafatin tuir saida maka sira hakarak, arguidu sira mós hatene katak sira nia hahalok ne’e lei bandu no sei hetan kastigu tuir lei.

Arguidu USN, DV no FJFdS, halo sira nia hahalok ne’e, ho forma livre, deliberada no konsiente, arguidu sira hatene momos katak, kria empreza fiktisiu ou seja Six One Commodities Asia, Unip. Lda, inklui númeru konta empreza nian (6010001161410, Banku Mandiri sukursál Dili-Timor-Leste no hafoin ida-ne’e, hamutuk ho Mike halo eskema Business Email Compromise (BEC) ka halo fraude iha komunikasaun e-mail falsifikadu ka interfere dadus informátiku hodi kontra empreza lejitimu nia hakarak hodi hetan konsumasaun ba fraude hodi simu transferénsia no ikus mai halo levantamentu ba fundus ne’ebé tama iha sira nia konta no hamosu prejuizu patrimoniál ba empreza ENN LNG (Singapura) Pte.Ltd (ENN) lei bandu no sei hetan kastigu, maski nune’e arguidu sira atua nafatin tuir saida maka sira hakarak.

Arguidu USN, DV, FJFdS, DdSFF, AJFdS, MU, SPD, NFNP, FCCO no BFdS, halo sira nia hahalok ne’e, ho forma livre, deliberada no konsiente, arguidu sira hatene momo’os katak, halo levantamentu ba osan $3.000.000 neʼebé mai hósi provimentu krime nian no laos sira nia direitu no halo sirkulasaun hodi fahe ba malu, halo transferénsia Internasional, okulta ka disimula, hodi benefisiu ba sira nia-an no ema seluk, hodi fo prejuizu ba empreza Empreza ENN LNG (Singapura) Pte Ltd (ENN, lei bandu, mezmu nune’e, arguidu sira atua nafatin tuir saida maka sira hakarak, arguidu sira mós hatene katak nia hahalok ne’e lei bandu no sei hetan kastigu tuir Lei.

Tanba ne’e, konstitui arguidu USN, DV, FJFdS, DdSFF, AJFdS, MU,SPD, NFNP no FCCO, nu’udar ko-autór materiál ho fórma konsurnada ba krime Asosiasaun Kriminoza, previstu no punídu tuir art. 188 n 2 ho 3 hósi Kódigu Penál.

Konstitui arguidu USN, DV, FJFdS, nu’udar ko-autor materiál ho forma konsumada ba krime Burla Informátika Agravada, previstu no punidu tuir art 269 hósi Kódigu Penál, konjuga ho artigu 30 Nu. 2 hósi Diploma. Hanesan.

Konstitui arguidu USN, DV, FJFdS, DdSFF, AJFdS, MU, SPD, NFNP, FCCO no BFdS, nu’udar ko-autór materiál ho forma tentatadu ba krime Brankeamentu Kapitál, previstu no punidu tuir art 313 n 1 hósi Kódigu Penál konjuga ho artigu 30 n 2 hósi Diploma Hanesan no Lei 13/2005 ne’ebé altera ba Lei n 17/2011 kona-ba rejime jurídiku ba prevensaun no kombate Brankamentu Kapitál no Finansiamentu Terorizmu.

Audiénsia julgamentu ne’e prezide husi Juíz koletiva, Fransisca Cabral, José Escurial no Juíz Estajiáriu, MP reprezenta Prokurador na’in-rua, João Marquez no Rafael Gusmão, arguidu na’in-10 hetan asisténsia legál husi Defensor Públiku no Advogadu privadu hamutuk na’in- ualu.

Jornalista     : Natalino Costa

Editora          : Julia Chatarina