Pe. Locatelli-PM-PR diskute kona-ba servisu sosiál-ema mukit iha Baukau
DILI, 05 Fevereiru 2026 (TATOLI)—Pe. Elisio Locatelli, SDB, kinta ne’e, hala’o enkontru ho Prezidente Repúblika, José Ramos-Horta, no Primeiru-Ministru, Kay Rala Xanana Gusmão, hodi diskute kona-ba servisu sosiál, atividade pastorál, prosesu edukasaun iha eskola Koléjiu Fatumaka liuliu kona-ba ema mukit sira iha Fatumaka, Gariuai, Baukau.
“Ha’u ho Maun Boot Xanana, ami na’in-rua atu hala’o enkontru semanál, maibé loke ho hasoru malu ida ho Padre Locatelli. Nia ema ida-ne’ebé servisu maka’as tebes ba rai no povu ida-ne’e. Kuaze semana-semana, iha tuku 07h00 dadeer iha kada kuarta-feira, nia sempre iha ona ha’u-nia rezidénsia. Ami ko’alia problema oioin no koa’lia mos kona-ba maluk pobreza ka mukit sira iha Baukau ne’ebá,” Ramos-Horta hateten ba jornalista sira hafoin ramata enkontru ho Padre Locatelli iha Palásiu Prezidensiál Nicolau Lobato, Bairru Pite.
Nia dehan, antes ne’e Xefe Estadu rasik ko’alia direita ho Xefe Governu atu sosa pesa ba tratór balun ne’ebé avaria iha área Fatumaka-Gariuai nian no Governu responde kedan.
“Semana hirak liuba, ha’u ko’alia ho Maun Boot, Xanana atu Governu tau osan sosa pesa sira hodi tau ba tratór hirak ne’ebé mak avaria iha Fatumaka ne’ebá hamutuk 16. Tratór hirak ne’e mak baibain fila rai populasaun sira-nian, igreja nian. Tratór sira-ne’e tinan 40 liu ona, maibé Primeiru-Ministru responde kedan no autoriza sosa pesa ba tratór hirak ne’e, agora iha ona dalan atu hadi’a tratór hirak ne’e,” Horta dehan.
Xefe Estadu ne’e hatutan, antes eleitu ba Prezidente Repúblika, nia fó ona apoia ba komunidade Salesiana Fatumaka ho osan rihun $50 to rihun $100.
“Uluk ha’u sempre apoiu ona orsamentu ha’u-nian rasik hamutuk rihun $50 to’o rihun $100 ba iha ne’ebá hodi aluga tratór sira-ne’e fila populasaun sira-nia rai. Sé ha’u la ajuda karik, sira labele utiliza liuliu komunidade tanba konvustivél karun no tratór liman ka hand tracktor ne’e fila rai oras ida $25. Bainhira ha’u apoia osan ba aluga komunidade bele selu de’it dolar $5 hodi fila sira-nia rai. Buat sira-ne’e hotu mak ohin ami ko’alia,” nia dehan.
Pe. Locateli hanesan fundadór eskola Koléjiu Fatumaka no misionáriu Salezianu ne’ebé hela iha Komunidade Salesiana Fatumaka durante tinan barak, ne’ebé fó mós apoiu morál ba povu Timor-Leste iha tempu defísil to’o ohin loron.
Ho ninia servisu sosiál noatividade pastorál durante iha luta ba libertasaun nasional iha tempu okupasaun Indonézia nian, mak lori misionáriu husi Italia ne’e simu kondekorasaun “Grande Kolár Orden Timor-Leste” husi Estadu Timor-Leste.
Jornalista : Hortencio Sanchez
Editór : Cancio Ximenes
