Governu-UN Women realiza forum diálogu hodi Komemora Loron Mundiál Feto
DILI, 05 Marsu 2026 (TATOLI)—Sekretária Estadu Igualdade (SEI), Elvina Sousa Carvalho, hamutuk ho Koordenadora Rezidente ONU iha Timor-Leste, Funmi Balongu, sosiedade sivíl, membru Governu no Parlamentu Nasionál, Kinta ne’e, realiza forum diálogu hodi komemora Loron Mundiál Feto ba da-115 ne’ebé monu iha 08 Marsu, ho tema “Direitu, justisa no asaun ba feto no labarik feto”.
Objetivu hosi forum diálogu ne’e atubele hatene atinjimentu ne’ebé maka iha no susesu sira liuliu ba iha lei no polítika no programa sira-ne’ebé mak espesifikamente atu empodera feto.
“Ohin ita hamutuk ho UN Women ho parseiru sira, membru Governu, sosiedade sivíl ho Parlamentu Nasionál hodi halo diálogu hodi hatene atinjimentu no susesu sira, atubele asegura direitu feto no labarik feto, ema ho defisiénsia sira, no mós implementasaun polítika nasionál sira. Ita iha polítika nasionál mak hanesan planu asaun nasionál Violénsia Bazeia ba Jéneru, Planu Asaun Nasionál ba ema ho defisiénsia, hanesan mós polítika nasionál sira-ne’ebé mak ita adota hanesan kovensaun CEDAW (Convention on the Elimination of All Forms of Dircrimination Agains Woman). Ita iha mós Beijing Declaration and Platform for Action. Hanesan Estadu ita tenke implementa polítika sira-ne’e,” nia dehan iha salaun Koffi Annan, Kaikoli.
Iha parte seluk, Koordenadora Rezidente ONU iha Timor-Leste, Funmi Balongu, informa ohin Sekretáriu Estadu Igualdade, UN Women, sosiedade sivíl, Parlamentu Nasionál, realiza forum diálogu hodi komemora loron internasionál feto ba da-115 ne’ebé mak hetan apoiu husi feto hotu-hotu, tanba ne’e loron UN Women nia naran hakarak hato’o parabéns ba Loron Mundiál Feto.
“Ha’u-nia onra ohin bele hamutuk ho imi iha-ne’e hodi komemora loron importante ne’e, hanesan globál, justisa loos, ba feto no labarik-feto. Buat ne’ebé akontese mak imi mós iha responsabilidade hotu, maibé imi sempre iha orgullu barak. Hanesan feto ida, ha’u gasta tempu ba ha’u-nia moris tomak hodi serbisu ba feto sira-nia direitu. Ohin ha’u sente bensaun tanba ha’u sai parte, ne’e sempre halo ita kontente. Ha’u hakarak agradese liuliu ba seguransa feto sira iha mundu tomak,” nia subliña.
Aleinde ne’e, Prezidente Komisaun F iha Parlamentu Nasionál ne’ebé mak trata Asuntu Saúde, Seguransa Sosiál no Igualdade Jéneru, Maria Barreto, dehan Parlamentu Nasionál nafatin ho nia kompromisu hodi luta nafatin ba igualdade, direitu, justisa no empoderamentu feto iha Timor-Leste.
Komisaun F sei prioriza Lei Traballu Doméstika
Iha biban hanesan, Prezidente Komisaun F iha Parlamentu Nasionál ne’ebé trata Asuntu Saúde, Seguransa Sosiál no Igualdade Jéneru, Maria Barreto, hateten iha tinan ida-ne’e (2026) Komisaun F sei tau prioridade ba Lei Traballu Doméstika.
“Iha tinan ida-ne’e, Parlamentu Nasionál liuhusi Komisaun F sei kontinua elabora Projetu Lei Traballu Doméstika. Husu imi-nia apoiu mai iha Komisaun F nune’e planu ne’ebé mak foti ba asuntu justisa no igualdade bele la’o ho susesu,” nia tenik ba jornalista sira hafoin partisipa forum diálogu kona-ba Loron Mundiál Feto.
Iha fatin hanesan, Diretora Ezekutiva JSMP, Ana Paula Marçal agradese tebes tanba iha tinan ne’e maka Komisaun F hakarak halo diskusaun no fó prioridade ba Lei Traballu Doméstika no espera katak Ministériu Justisa bele aselera lori bá Konsellu Ministru aprova, depoiz bá kedas Parlamentu Nasionál hodi halo diskusaun.
“Maibé importante mak ne’e, Governu tenke fó prioridade katak hakarak duni tenke iha lei sira ne’e. Ita hakarak buat hotu-hotu tenke iha mundansa,” Ana Paula informa.
Jornalista: Osória Marques
Editór: Xisto Freitas da Piedade
