Rejime foun la permite ajente Estadu tama iha arte marsiál
DILI, 05 Marsu 2026 (TATOLI) – Ministru Interiór, Francisco da Costa Guterres, informa iha proposta lei númeru 24/VI(3a)-Rejime Jurídika Prátika Arte Marsiál define inkompatibilidade ba iha ajente Estadu bainhira envolve iha arte marsiál.
“Proposta-lei ne’e iha definisaun ida klara, kona-ba inkompatibiliadade ba iha ajente Estadu nian balun. Purezemplu, ita ko’alia kona-ba Polísia ho Forsa Defeza. Iha ne’ebá hateten sira inkompativel ho arte marsiál, ne’ebé ita tau katak nia tenke hili ida arte marsiál ou forsa”, governante hateten hafoin ramata audiénsia públika ba proposta lei ne’e iha Parlamentu Nasionál, ohin.
Nia dehan lei ne’e prevee mós ba ofisiál justisa ho majistradu sira, tanba sira hala’o funsaun importante Estadu nian hodi ka’er justisa, entaun tenke independente, imparsiál hodi tesi lia ho didi’ak.
“Depois ba funsionáriu, tanba sira mós hala’o misaun Estadu nian ida, tenke serbí ho neutralidade, imparsialidade, se la’e ita iha problema hotu. Sira mós dalabarak hili fali ida ne’ebá, entaun buat sira ne’e mak ita dehan la’e, sira inkompativel ba iha organizasaun arte marsiál”, dehan.
Ministru adianta katak bainhira lejizlasaun ne’e aprova mak sei define klaru liután iha dekretu-lei ida.
Notísia relevante: https://hadomi.cloud/2026/03/05/governu-hakarak-regulariza-pratika-arte-marsial-hodi-hola-parte-iha-dezenvolvimentu/
Jornalista: Nelson de Sousa
Editora: Maria Auxiliadora
