ETO garante stock kombustivel sufisiente to’o fulan haat
DILI, 06 Marsu 2026 (TATOLI)-Empreza Esperansa Timor Oan Unipessoal Lda., (ETO), nu’udar importadora ba kombustivel, garante stock ba transporte públiku no privadu iha Timor-Leste to’o fulan haat nia laran.
Diretór-Ezekutivu ETO, Nilton Gusmão, subliña katak funu iha médiu oriente sei lori impaktu boot ba atividade petrolífera iha mundu tomak, tanba refinaria barak maka depende ba mina matak husi país médiu oriente nian. Maibé, ba Timor-Leste daudaun kombustivel sufisiente hela no folin mós sei normál.
“Ita hotu hatene daudaun akontese funu iha médiu oriente, maibé ita-nia stock laiha problema tanba iha domingu semana kotuk ha’u bá Singapura ko’alia ho ema, tau prioridade ba Timór atu lori kombustivel mai. Nune’e, iha loron 09 Marsu agora sei iha tan ró ida lori kombustivel mai atu asegura fulan haat ba oin nian”, Nilton Gusmão hateten.
Hanesan empreza importadora, dirijente ne’e garante mina ba fulan haat, maibé la signifika katak situasaun atu di’ak de’it no klaru Timor-Leste mós sei hetan impaktu.
“Ha’u fiar kualker krize sempre iha nia solusaun ne’ebé ita labele pániku. Ami-nia mós kontinua komunika ho fornesedór sira atu asegura kombustivel ba ita-nia rai, nune’e atividade la’o nafatin. Husu ba públiku mantein kalma, labele iha espekulasaun. Ha’u hanesan importadór garante katak husi ohin ba to’o fulan haat mai oin ita laiha problema”, nia asegura.
Prezidente Autoridade Nasionál Petróleu, Gualdino do Carmo da Silva, hateten autoridade reguladora ba kombustivel daudaun nafatin halo komunikasaun ho empreza impotadora sira katak stock sufisienta hela no iha mós oráriu sira mina atu tama mai.
“Funu iha médiu orienta, Timor-Leste la sai husi nasaun sira seluk ne’ebé sei hetan impaktu ida-ne’e. Maibé, nafatin ita iha kolaborasaun di’ak ho ita-nia importadór sira ba iha kombustivel ninian nune’e asegura fornesimentu kombustivel ba ita-nia públiku”, katak.
Tuir ANP nia monitorizasaun ba empreza impotadora no ba abastesimetu sira, daudaun folin mina la’o normál, tanba stock sira ne’e tuan nian, maibé kuandu hotu tenke foti fali husi foun, nune’e funu kontinua mak iha mudansa ba presu mós. Tanba ne’e, ANP husu ba importadór sira bainhira iha mudansa ruma tenke fó folin ne’ebé rezoavel ba públiku.
Gualdino mós relata katak nasaun sira ne’ebé importasaun mina mak Índia, Indonézia, Singapura no seluk tan.
Ministru Petróleu no Rekursu Minerál, Francisco Monteiro, dehan relasiona ho funu médiu oriente daudaun seidauk iha impaktu ba Timor-Leste, maibé funu ne’e kontinua mak ba oin sei iha mós efeitu ba nasaun.
“Funu ne’e neineik sei alastra ba presu mundiál ba petróleu no gás, maibé la’ós de’it ida-ne’e. Sei iha mós impaktu maka’as ba ekonomia mundiál. Maibé to’o ohin loron ita kontinua akompaña ninia impaktu sira ne’e parese fulan sira oin mai bele sente daudaun ona ninia impaktu”, dehan.
Esforsu ne’ebé Governu iha hodi halo intervensaun bainhira funu kontinua mak daudaun ministériu ko’alia ona Timor GAP no Autoridade Nasionál Petróleu halibur malu hodi aborda estratéjia balun ona kona-ba antisipasaun ninian no sei lori ba iha Konsellu Ministru haree asuntu ne’e hodi foti nia pasu rasik.
Notísia relevante: Folin mina-rai sa’e tanba konflitu EUA-Iraun aumenta
Jornalista: Arminda Fonseca
Editora: Maria Auxiliadora
