SEKOMS-RTTL relata prosesu foun konstrusaun edifisiu RTTL, E.P ba Xefe Estadu
DILI, 06 Marsu 2026 (TATOLI)–Sekretariu Estadu Komunikasaun Sosiál (SEKOMS), Expedito Dias Ximenes, akompañadu husi Prezidente Radiu Telivizaun Timor-Leste, Empreza Públika (RTTL, E.P), Rosario da Grasa Maia, sesta ne’e, hasoru malu ho Xefe Estadu José Ramos-Horta hodi relata prosesu foun konstrusaun edifisiu RTTL, E.P nian ne’ebé durante ne’e la’o maibé paradu hela.
“Ami mai hasoru Prezidente Repúblika atu hato’o prosesu no progresu konstrusaun edifisiu RTTL, E.P nian. Ita hotu hatene katak durante fulan barak nia laran paradu, entaun prosesu agora la’o fila-fali. Foin lalais UNDP aprezenta ona dezeñu foun no hetan ona aprovasaun husi Ministériu Obra Públika (MOP),” Expedito hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite.
Nia dehan, prosesu ba oin mak sei halo fali re-konkursu públiku hodi buka empreza foun atu kontinua konstrui hikas obra ne’e.
“Entaun, prosesu ba oin mak sei halo fali re-konkursu públiku iha fulan ida-ne’e, sei loke konkursu internasionál. Bainhira empreza ida-ne’ebé manán nia durasaun ba konstrusaun sei finaliza durante fulan 16. Signifika iha fulan-Setembru 2027 mak finaliza. Empreza ida uluk ne’e retira ona tanba laiha kapasidade atu hala’o obra ne’e. Ita hatene katak rai iha Kaikoli ne’e bee barak iha okos, entaun empreza ne’e laiha kapasidade, empreza husi Indonézia nian, entaun ida-ne’e prosesu ba daruak nian,” nia dehan.
Projetu ne’e hetan apoiu orsamentu husi Governu no Povu Japaun ho montante millaun $5,9 no orsamentu ne’e jere direta husi UNDP.
“Orsamentu ne’e mai direta husi Japaun maibé Governu la kaer osan ne’e, UNDP mak kaer hodi halo jestaun. Aban bainrua uma ne’e tomak mak entrega mai Governu. Edifisiu ne’e iha dezeñu inisiál andar hamutuk haat (4) maibé iha ida agora ne’e muda fali ba andar tolu (3), tuir kapasidade rai iha Kaikoli ne’e. Dezeñu ida primeiru ne’e iha sala uma ne’e nian bele kapasita ema liu 1000 maibé ida foun ne’e kapasita de’it ema liu 500,” nia hateten.
Antes ne’e, konstrusaun ba edifisiu ne’e lansa ona husi Primeiru-Ministru, Kay Rala Xanana Gusmão iha fulan-neen (6) ba kotuk, maibé empreza laiha kapasidade abandona hela obra ne’e.
Ho nune’e mak UNDP foti desizaun hala’o reuniaun ho Governu no parte Japaun nian hodi loke hikas konkursu públiku atu nune’e bele finaliza tiha obra ne’e.
Jornalista : Hortencio Sanchez
Editór : Cancio Ximenes
