Longuinhos Monteiro marka prezensa iha julgamentu kazu pekulatu envolve membru PNTL na’in-tolu
DILI, 11 Marsu 2026 (TATOLI)--Tribunál Judisiál Primeira Instánsia Dili (TJPID), Kuarta ne’e, kontinua halo julgamentu ba kazu pekulatu ne’ebé envolve husi membru Polísia Nasionál Timor-Leste (PNTL) na’in-tolu DD, LL no BDS, iha tinan 2013.
Iha julgamentu kontinuasaun ne’e, Tribunál ajendadu hodi rona depoimentu husi sasin antigu Komandante Jerál PNTL, Komisáriu Longuinhos Monteiro, ne’ebé to’o iha Tribunál iha tuku 10:30, akompaña husi seguransa sira.
Tribunál liuhusi Juiza Ercila de Jesus, ne’ebé prezide koletivu ba kazu ne’e halo identifikasaun ba sasin molok fó deklarasaun.
Nune’e, Longuinhos Monteiro hato’o ba Tribunál katak daudaun nia nu’udar Diretór Jerál Servisu Nasionál Intensia (SNI) no prontu harii lia loos nu’udar sasin perante julgamentu.
Sasin deklara ba Tribunál katak momentu ne’ebá (2013), bainhira nia hanesan Komandante Jerál PNTL, hetan orientasaun husi Ministru Defeza katak Governu sei halo serimónia natál konjuta iha Oékusi.
Tanba ne’e, hafoin simu orientasaun, nia parte konvoka kedas enkontru ho parte PNTL no FALINTIL-Forsa Defeza Timor-Leste (F-FDTL) hodi forma ekipa komisaun organizadora ba eventu natál konjuta.
Nia haktuir, momentu ne’ebá nia fó orden ba ekipa komisaun organizadora atu halo seguransa másimu hodi fó susesu ba atividade natál konjuta. Momentu ne’ebá nia envolve mós parte Lojístika husi Komandu PNTL atu haree kona-ba fornesimentu kombustível iha eventu referida.
Notísia relevante : Longuinhos Monteiro sai sasin ba kazu pekulatu ne’ebé envolve membru na’in-tolu PNTL
Nia dehan, antes loron-ida atu tama ba atividade, nia bá ona Oékusi hodi observa situasaun no momentu ne’e nia mos garante katak Xefe Estadu Maiór Jenerál Forsa Armada (XEMGFA) Tenente Jenerál Lere mós iha ne’ebá.
Hatutan tan katak, altura ne’ebá ahi iha Oékusi mate, entaun Longuinhos Monteiro fó orden ba Diresaun Lojístika PNTL atu haree oinsá uza tiha mina hodi abastese mina ba Jerádór iha Mahata hodi fornese eletrisidade ba fatin festa to’o la’o ho di’ak.
Hatan ba Ministériu Públiku (MP), Prokuradora Lídia Soares nia pergunta katak: “momentu ne’e ita mós orienta atu abastese mina ba karreta privadu, tanba iha deklarasaun arguidu ida nia iha julgamentu ba kazu ida temi, katak sasin momentu autoriza mina ne’ebé PNTL ne’e abastese ba karreta privadu sira.”
Nune’e, sasin hatan katak nia rasik laiha koñesimentu ba ida-ne’e.
“Ida-ne’e ha’u laiha koñesimentu, tanba momentu ne’e ha’u orienta katak mina ne’ebé mak iha ne’e só ense de’it ba karreta ofisiál de’it, no momentu ne’ebá ense karreta ofisiál de’it ne’ebé atu ajuda ba atividade serimónia natál konjuta no ense ba karreta militár no Polísia atu halo kontrolu hodi seguransa ba fatin ne’ebá.” Sasin Longuinhos Monteiro deklara iha sala julgamentu, TJPID, Kaikoli, Kuarta ne’e.
Bainhira Tribunál konfronta dokumentu sira kona-ba sasin nia desizaun sira ne’e, sasin rekoñese katak nia mak asina dokumentu sira ne’e hodi fó autorizasaun ba Diretór Lojístika PNTL momentu ne’ebá, arguidu BDS katak haree mina hodi abastese ba Jerádór iha Mahata Oékusi hodi fornese eletrisidade iha fatin ba realizasaun natál konjuta ne’e.
“Se kuandu mina la to’o, entaun bele uza mina Komandu Munisípiu Oékusi hodi uza maibé tenke troka filafali. Tanba ne’e, momentu abastese mina ba jerádór no karreta ofosiál ka Governu. Enkuantu abastese ba karreta privadu ne’e ha’u laiha koñesimentu,” sasin hato’o.
Sasin katak, abastesimentu ba jeradór no karreta ofisiál Governu, momentu ne’e nu’udar Komandante Jerál atu asegura atividade festa natál konjuta iha Oékusi.
“Momentu ne’e ha’u mak fó orden duni katak ense mina ba karreta ofisiál de’it no mina restu mós tenke abastese ba kareta ofisiál, ba kareta pribadu ha’u laiha koñesimentu,” nia tenik.
Longuinhos Monteiro fó sai tan, abastesimentu mina ba jerádór no karreta ne’e ho objetivu atu asegura festa ne’e la’o di’ak.
Hafoin Tribunál rona tiha depoimentu husi sasin Longuinhos Monteiro, Tribunál halo kedan adiamentu ba julgamentu ba loron 08 Abríl 2026 tuku 15:00 lorokraik hodi halo alegasaun ba kazu ne’e.
Audiénsia julgamentu ne’e prezide husi Juiza koletivu, Ercila de Jesus, Ana Paula Fonseca, José de Araújo, MP reprezenta husi Prokuradora Lídia Soares no arguidu sira hetan asisténsia legál husi Defensór Públiku no Advogadu Privadu.
Jornalista : Natalino Costa
Editora : Julia Chatarina
