Parlamentu aprova ho unanimidade Projetu Lei Adosaun iha finál globál
DILI, 16 Marsu 2026 (TATOLI)-Parlamentu Nasionál liuhusi reuniaun plenária ohin aprova Projetu Lei númeru 9/VI(2a)-Regulamenta Prosesa Adosaun no alterasaun Kódigu Sivíl Lei númeru 10/2011, loron 14 Setembru, iha finál globál ho votu a favór 57, kontra no abstensaun 0.
Prezidente Komisaun F ne’ebé trata Asuntu Saúde, Igualdade Jéneru no Inkluzaun Sosiál, Maria Gorumali Barreto, hateten projetu lei ne’e atu proteje no promove salvaguarda direitu labarik sira-nia ne’ebé konsagra ona iha Konstituisaun iha artigu 18.
Deputada relatora Komisaun F, Nurima Ribeiro Alkatiri, hato’o relatóriu Komisaun nian ba debate espesialidade projetu lei ne’e iha proposta alterasaun 32 ne’ebé halo diskusaun detalla hodi prodús lejizlasaun ida kualidade serbí no proteje di’ak liután labarik sira iha prosesu adosaun.
Projetu lei ne’e iha ninia espozisaun motivu fundamenta ba nesesidade intervensaun lejizlativa hodi haree lakuna norma prosedimentu no prosesuál kona-ba adosaun ezistente iha ordenamentu jurídiku, kompleta rejime substantivu adosaun nasionál, ne’ebé regula iha Kódigu Sivíl.
Nune’e mós regula adosaun internasionál, husi Konvensaun Haia relativa ba Protesaun ba Labarik no Kooperasaun iha Matéria Adosaun Internasionál.
Iha expozisaun motivu ne’e aprezenta mós enkuadramentu jurídiku konstitusionál, legál no internasionál aplikavel iha matéria adosaun. Aprezenta mós konteúdu diploma no referénsia opsaun polítika-lejizlativa subjasente regulasaun prosesu adosaun.
Projetu lei ne’e nia testu orijinál iha artigu hamutuk 71, kompostu husi Kapítulu I to’o Kapítulu V.
Notísia relevante: Projetu Lei Adosaun aprovadu iha jeneralidade
Jornalista: Nelson de Sousa
Editora: Maria Auxiliadora
