MI sei loke investigasaun ba Komisaun Rekrutamentu lideradu hosi Komisáriu Pedro Belo
DILI, 25 Marsu 2026 (TATOLI)—Governu liuhusi Ministériu Interiór (MI) sei loke prosesu investigasaun hasoru Komisaun Rekrutamentu ne’ebé lideradu hosi atuál Segundu Komandante Jerál Polísia Nasionál Timor-Leste (PNTL) Komisáriu Polísia Pedro Belo.
Ministru Interiór, Francisco da Costa Guterres, hateten, ekipa Komisaun Supervizaun ba Rekrutamentu ba kandidatu membru PNTL foun ne’ebé lideradu husi Paulo Assis Belo, liuhusi rezultadu supervizaun rekomenda ba Konsellu Ministru atu halo investigasaun.
“Komisaun Rekomenda ona, ne’ebé ami sei halo investigasaun, kuandu Investigasaun ne’e mai ita sei halo prosesu depois mak ita haree,” Ministru hato’o ba jornalista sira iha Palásiu Governu, Kuarta ne’e.
Nia dehan, kuandu Komisaun Rekrutamentu ne’e mak hetan duni indísiu irregularidade mak sei prosesa ba kriminál.
“Se iha prosesu ne’e mak hetan buat ruma iha laran mak ita sei la’o tuir prosedimentu iha laran,” nia akresenta.
Notísia relevante : PM Xanana rekomenda halo rekrutamentu foun ba kadetes PNTL
Governante ne’e hatutan: “Sim, Ministru sei haree ida-ne’e hotu kedas. Maibé ita sei halo uluk investigasaun, prosesu ne’e falla iha ne’ebé depois ita sei haree tan sé mak envolve iha kestaun krime ruma mak ita sei rekomenda investigasaun kriminál tenke prosesa.”
Ministru la temi prazu investigasaun ne’e to’o bainhira no dehan mós katak la’ós rekrutamentu ne’e la susesu maibé Governu hakarak rekrutamentu ne’e labele interven beibeik husi polítiku tanba Governu entrega tomak rekrutamentu ne’e ba PNTL.
“Ita lakohi polítiku mak kahur nia liman ba nafatin, tanba ne’e mak ita fó ba ne’ebá, prontu iha prosedimentu balun laloos ita kurize no hadi’a para ita fó nafatin ba sira para aban bainrua husik sira iha rekrutamentu, lalika tama fali ita tau fali kanuru tohar iha laran, ita hakarak koko falla ita hadi’a,” nia katak.
Nia dehan, Governu lakon tempu atu hadi’a buat hotu, tanba ne’e espera katak tinan-rua mai PNTL bele independente.
“Maibé ita mós tenke hanorin sira fó ona mai. Imi halo di’ak ba hodi hetan imi-nia membru ne’ebé di’ak para ne’ebé iha méritu para lori serbisu PNTL ba oin. Ida-ne’e mak ita hakarak,” nia hato’o.
Jornalista : Natalino Costa
Editora : Julia Chatarina
