PM Xanana vizita PA RAEOA baixa iha HNGV
DILI, 26 Marsu 2026 (TATOLI)–Primeiru-Ministru, Kay Rala Xanana Gusmão, kinta ne’e, vizita Prezidente Autoridade Reziaun Administrativa Espesiál Oekusi Ambenu (RAEOA) Régio da Crus ne’ebé moras no daudaun ne’e baixa no hala’o hela tratamentu iha Hospitál Nasionál Guidu Valadares (HNGV-sigla portugés) Dili.
Notísia Relevante: PA RAEOA simu ona karta husi Governu, mandatu sei termina iha 31 Marsu 2026
“Nia moras hela, antes ha’u atu mai Palásiu Prezidensiál ha’u sei ba vizita tiha nia. Depois, ha’u sei ba haree tan nia,” Xefe Governu Xanana Gusmão hateten ba jornalista sira iha Palásiu Prezidensiál Nicolau Lobato Dili, kinta ne’e.
Nia dehan, iha hasoru malu semanál ho Xefe Estadu José Ramos-Horta ne’e, nia informa mós kona-ba Prezidente Autoridade RAEOA nia moras.
“Hasoru malu ho Prezidente Repúblika ha’u informa mós kona-ba nia Prezidente Autoridade nia moras ne’e, sei iha ekipa ida atu ba haree tan nia,” Xanana dehan.
Xanana esplika, tuir informasaun ne’ebé simu husi médiku sira iha HNGV katak Prezidente RAEOA sofre moras fuan.
Tuir ajenda, loloos ne’e, Prezidente Autoridade RAEOA tenki fila ba Oekusi iha Kinta (26/03) dadeersan ne’e maibé iha tuku 03h00 dadeersan hetan atakasaun derepente, no daudaun ne’e sei kontinua baixa hela iha Hospitál Nasionál Guido Valadares (HNGV).
Entretantu, Agência Tatoli tenta atu konfirma Diretór Servisu Apoiu Diagnostiku no Terapéutiku iha Hospital Nasionál Guido Valadares (HNGV), Vidal de Jesus Lopes, maibé diretór referida hala’o hela viajen servisu ba Baukau no sei disponivél fó entrevista iha Segunda semana oin.
Jornalista : Hortencio Sanchez
Editór : Cancio Ximenes
