Maldivas halakon TL 2-1 iha jogu kualifikasaun AFC 2027
DILI, 31 Marsu 2026 (TATOLI)—Ekipa Maldivas susesu iha nia jornada ikus faze grupu kualifikasaun tasa Azian Football Confederation (AFC) 2027 bainhira halakon Timor-Leste 2-1.
Bainhira árbitru fó orientasaun liuhusi apitu nia-lian iha kampu laran, ekipa rua lansa kedan kontra atake ba malu liuhusu jogadór sira ho tékniku no abilidade ne’ebé sir aida-idak iha.
Jogadór husi ekipa uma-na’in Maldivas halo atake ne’ebé maka’as hasoru Timor-Leste, maibé Timor-Leste la nonook, responde mós ho atake ne’ebé brillante halo Maldivas susar atu hetan alvu ne’ebé di’ak.
Minutu kontinua la’o, jogu avansa, jogadór nasaun rua hala’o jogu ne’ebé la fó frakeza ba malu, maske iha fallansu iha kampo laran maibé laiha oportunidade ba ekipa rua atu prodús golu.
Maldivas hatudu nia forsa ne’ebé adekuadu ho maneira pasa bola husi ain ba ain, maneira finta bola ba mai, atu ultrapasa de’it defeza Timor-Leste nian maibé Timor-Leste la fó fatin.
Maske Maldivas lansa atake ne’ebé maka’as iha nia-uma rasik, la sai difikuldade ba Timor-Leste. Ekipa lafaek kontinua reziste ho kapasidade ne’ebé jogadór sira iha, maibé só hamate de’it Maldivas nia jogu, la prodús golu.
Rezisténsia ne’ebé Timor-Leste halo la sai de’it hanesan reziste, hatudu duni prova iha minutu 45+3, tanba Maldivas susar atu hetan oportunidade fura rede Timor-Leste nian, ikus iha minutu primeira parte rezultadu mantein ho empata 0-0.
Semo ba segunda parte ekipa rua kontinua halo kontra atake ba malu hodi buka sé loos mak atu hatama uluk golu.
Timor-Leste hatudu jogu ne’ebé bonitu hodi domina kampu laran halo Maldiva araska atu kombate.
Husi atake hirak ne’e, hamonu duni Maldivas nia mentalidade hodi kontrolu, iha minutu 66 jogadór Timor-Leste liuhusi avansadu João Pedro halo jogu individu atu lansa tiru ba rede Maldiva maibé ladun seguru tanba defeza na’in-rua Maldiva nian halo blokeia metin.
Ho nune’e João Pedro deside soe bola ba nia kolega Corcino Lemos konsege fura duni rede Maldiva hodi muda rezultadu sai 1-0.
Golu ne’e sadik liutan Maldivas nia emosaun, sira kontinua joga ho kalma, Timor-Leste halo presaun maka’as maibé labele ona fura rede Maldiva nian tanba Maldivas halo blokeia metin.
Maske nune’e Maliva nafatin esforsu, ikus esforsu hirak ne’e la hela ho esforsu tanba iha minutu 89 jogadór Maldiva Mohamed Irufaan konsege fura rede Timor-Leste hodi hatur rezultadu sai empata 1-1.
Jogu la’o besik termina ona, maibé tekir-tekir iha minutu adisionál 90+4 jogadór Timor-Leste komete erru iha grande área oin fó oportunidade ba árbitru deside penalidade ba Maldivas.
Penalidade ne’e ezekuta husi jogadór Ali Fasir konsege borus tama tan ba rede Timor-Leste nian hodi termina Maldivas nia vitoria 2-1.
Jogu ne’e hanesan parte ida hosi AFC Asian Cup, Kualifikasaun Grupu A.
Husi rezultadu ne’e fó kedan oportunidade ba Maldivas hetan pontu tolu 3, enkuantu Timor-Lese mós hetan ona pontu tolu (3) bainhira iha jogu primeiru kontra Maldivas iha Austrália konsege manán 1-0.
Biar nune’e ekipa rua labele ultrapasa ba kualifikasaun tasa AFC 2027.
Tasa Ázia 2027 sei hala’o iha Arábia Saudita husi loron 07 fulan-Janeiru to’o loron 05 fulan-Fevereiru tinan 2027. Torneiu ne’e sei sentra iha sidade prinsipál tolu: Riad, Jeddah, no Al Khobar, uza estádiu ualu ne’ebé diferente, inklui Estádiu King Fahd iha Riad, ne’ebé sei sai uma-na’in ba jogu abertura no finál sira.
Sidade uma-na’in sira: Riyadh, Jeddah, no Al Khobar. Estádiu prinsipál sira: King Fahd Stadium (Riyadh), King Saud University Stadium (Riyadh), Kingdom Arena (Riyadh), Al Shabab Stadium (Riyadh), King Abdullah Sports City (Jeddah), Prince Abdullah Al Faisal Sports City (Jeddah), Al-Khobar Stadium (Khobar).
Ida-ne’e mak edisaun ba dala 19 husi Tasa Ázia nian no Arábia Saudita hetan selesaun hafoin Índia sai husi prosesu lisitasaun nian.
Jornalista : Hortêncio Sanchez
Editór : Cancio Ximenes
