AMB hahú prepara elaborasaun PAA 2027
BAUKAU, 01 Abríl 2026 (TATOLI)—Autoridade Munisipál Baukau, Kuarta ne’e, hahú diskute ba preparasaun elaborasaun Planu Asaun Anuál (2027) iha-ne’ebé partisipa husi dirijente serbisu munisipál inklui administradór postu administrativu na’in-ualu.
Sekretáriu Munisipál Asuntu Administrasaun no Finansa Autoridade Munisipál Baukau, Juvinal Daniel Filipe, esplika preparasaun elaborasaun Planu Asaun Anuál (PAA) 2027 ne’e bazeia ba rezultadu reuniaun konsellu suku to’o Asembleia Postu Administrativu (ASPA) ne’ebé finaliza ona nune’e tuir kalendáriu iha trimestrál daruak kontinua ba elabora PAA tuir oreintasaun husi Governu sentrál.
“Kada responsavel ba diresaun sira tenke halo planu bazeia ba kompeténsia katak tinan oin atu halo no implementa programa ne’ebé prioridade bazeia ba PDM nune’e ita bele trasa ba orsamentu,” Juvinal Filipe hateten iha Salaun Apuramentu Administrasaun Munisipál Vila Nova, Kuarta ne’e.
Juvinal Filipe relata elaborasaun PAA bazeia ba Planu Dezenvolvimentu Munisipál (PDM) 2025-2030 ne’ebé antes ne’e halo ona revizaun, konsulta no aprova liuhusi Reuniaun Konsellu Koordeansaun Munisipál (KKM) iha tinan 2025 ne’ebé planu elaborasaun PAA sei hato’o husi postu administrativu no kada serbisu Munisipál.
Nia subliña iha sorumutu referidu AMB liuhusi Ajénsia Planeamentu Integradu Munisipál aprezenta formatu PAA bazeia ba formuláriu dalan ba futuru husi Ministériu Finansa ho kategoria tolu hanesan indikadór ne’ebé foku ba planu serbisu, baseline no meta bazeia ba atinjimentu tinan anteriór hodi sai sasukat ba planu orsamentu.
“Ha’u-nia esperansa sira tenke esforsu atu planu ezekusaun ne’e ho kualidade katak atinjimentu tuir meta tanba sai prioridade bazeia ba nesesidade komunidade,” Juvinal Filipe akresenta.
Iha fatin hanesan, Administradór Postu Administrativu Kelikai, Paulo Jacinto Moreira, hateten nu’udár autoridade postu sei aprezenta PAA 2027 ho atividade rua hanesan programa administrasaun postu no dezenvolvimentu ba suku bazeia ba rezultadu reuniaun ASPA.
“Ami aprezenta ona ba AMB. Ha’u espera katak Prezidente Autóridade Munisipál (PAM) sei defende ami-nia planu,” Paulo informa.
Entretantu, PDM 2025-2030 foku ba setór haat importante hanesan dezenvolvementu sosiál hanesan área edukasaun, saúde no inkluzaun sosiál, dezenvolvementu institusionál hanesan área kapasitasaun liuhosi formasaun no treinamentu, infraestrutura foku ba estrada, bee-moos inklui eletrisidade no setór ekonomia foku ba planu dezenvolvimentu agrikultura no turizmu.
Jornalista: Natalino Belo
Editór: Xisto Freitas da Piedade
