Merkadu Kelikai sei muda bá Lawaliu
BAUKAU, 01 Abríl 2026 (TATOLI)—Autoridade Postu Administrativu Kelikai planeia muda negosiante husi merkadu anteriór ba área Lawaliu, Suku Baguia, Postu Administrativu Kelikai.
Administradór Postu Administrativu Kelikai, Paulo Jacinto Moreira esplika desizaun referida foti hafoin halo konsulta no aprova liuhusi Reuniaun Asembleia Postu Administrativu (ASPA) iha-ne’ebé ho objetivu hakarak iha merkadu ne’ebé seguru no sufisiente.
“Ita planu atu halo konstrusaun merkadu Kelikai iha tinan ida-ne’e, tanba ne’e postu liuhusi enkontru estraordináriu konsulta ona komunidade ne’ebé entrega rai,” Administrador Postu Kelikai hateten iha Salaun Apuramentu Administrasaun Munisipál Vila Nova, Baukau, Kuarta ne’e.
Paulo Moreira relata área ne’ebé sei konstrui merkadu sei lokaliza área Bubur-Laran, Aldeia Lawaliu, Suku Baguia ho medida ekatare rua ne’ebé Ministériu Obra Públika (MOP) hamutuk ho autoridade Kelikai halo ona levantamentu dadus nune’e sei hein desizaun finál husi Governu.
Autoridade postu preokupa ho kondisaun merkadu Kelikai atuál ne’ebé lokaliza iha Lakuliu ne’ebé menus espasu no konsideradu risku ba negosiante tanba mobilizasaun transporte ne’ebé antes ne’e afeta ba negosiante ida lakon vida.
“Husu ba Governu sentrál aselera lalais iha iha tinan ida-ne’e nune’e komunidade bele bá fatin ne’ebé mak seguru,” Paulo sujere.
Entretantu, totál negosiante iha Postu Administrativu Kelikai hamutuk 200-resin kompostu permanente 80 no ambulante 100-resin ho tipu negósiu hanesan negosiante roupa uzada (obralan), nesesidade bázika, produtu lokál, matadouru no ikan.
Jornalista: Natalino Belo
Editór: Xisto Freitas da Piedade
