Ajénsia TATOLI, I.P no HKETO Jakarta inisia kooperasaun estratéjiku
DILI, 01 Abríl 2026 (TATOLI)—Ekipa husi Hong Kong Economic and Trade Office (HKETO) Jakarta, Tersa ne’e, hasoru malu ho Prezidente Konsellu Diretivu Ajensia Notisioza Timor-Leste, Institutu Públiku (Ajénsia TATOLI, I.P), Noémio Falcão, Vise-Prezidente Asuntu Administrasaun no Finansa, Madalena Pereira Carlos no Vise-Prezidente Asuntu Mídia no Jornalístika, Zezito da Silva hodi hahú inisia kooperasaun estratéjiku sira.
Reprezentante HKETO, Kathy Tse, hateten, durante ne’e ekipa akompaña ho di’ak tebes produsaun notísia husi Ajénsia TATOLI, I.P no nota katak produtu jornalíztiku sira hatudu kualidade di’ak no informasaun konfiável.
Tanba ne’e, HKETO hakarak inisia sorumutu hodi diskute ho membru Konsellu Diretivu kona-ba kooperasaun sira tuir papél ne’ebé iha, liuliu kona-ba promosaun kooperasaun iha área ekonomia, komérsiu no komunikasaun.
Sorumutu inisiál ne’e hatudu sinál pozitivu tebes no vontade forte husi parte rua atu hametin relasaun institusionál no hatudu papél estratéjiku nu’udar ponte ligasaun entre Hong Kong ho rejiaun inklui Timor-Leste.
Durante reuniaun, parte rua subliña kompromisu kooperasaun iha setór komunikasaun sosiál, liuliu iha área jornalizmu, ho foku ba fasilita kontaktu no rede entre instituisaun mídia, publikasaun kontéudu jornalíztiku, hala’o programa interkámbiu profisionál ba jornalista sira, fasilita oportunidade formasaun no dezenvolvimentu kapasidade, asesu ba esperiénsia no prátika di’ak husi Hong Kong, inklui promosaun inovasaun iha mídia no utilizasaun teknolojia komunikasaun moderna.
Prezidente Konsellu Diretivu Ajénsia TATOLI, I.P, Noémio Falcão, konsidera reuniaun ne’e nu’udar etapa inisiál, nune’e importante atu harii baze sólidu ba koperasaun sustentável entre parte rua, ho espetativa atu kontinua dezenvolve programa konkretu iha futuru.
HKETO Jakarta dezempeña papel importante nu’udar fasilitadór kooperasaun entre Hong Kong no TATOLI, I.P liuhusi ligasaun institusionál, transferénsia koñesimentu no promosaun oportunidade formasaun.
Sorumutu ne’e marka kompromisu klaru husi parte rua atu haburas kooperasaun iha área komunikasaun no jornalizmu, ho benefísiu diretu ba dezenvolvimentu mídia no rekursu umanu iha Timor-Leste.
TATOLI
