TL-Indonézia sei halo negosiasaun Fronteira Marítima ronda datoluk iha 25-30 Abríl
DILI, 02 Abríl 2026 (TATOLI) –Primeiru-Ministru, Kay Rala Xanana Gusmão, hateten diskusaun kontinuasaun ba negosiasaun Fronteira Marítima (FM) ronda datolu entre Timor-Leste ho Indonézia sei hala’o iha 25 to’o 30 Abríl 2026 iha Singapura.
Notísia Relevante: TL-Indonézia sei halo negosiasaun Fronteira Marítima ronda datoluk iha Singapura
“Ha’u informa ona ba Prezidente katak, diskusaun ita ho Indonézia kona-ba Fronteira Marítima hala’o iha Sigapura. Ha’u sei ba, hahú loron 25 to’o loron 30 fulan-Abríl tinan ne’e,” Xanana hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, diskusaun FM entre nasaun rua atu konklui sei lori tempu ho nune’e nia husu ba públiku atu hein ho kalma to’o loron ida sei finaliza ho susesu.
“Ida-ne’e la’ós ita ba asina kedan, sei disukute lori tempu, ami hasoru malu iha fulan-Agostu 2025, ba fali iha Jogjakarta iha Dezembru 2025, ida agora ne’e ba dala tolu. Ita haree buat barak, tasi ne’e husi ne’e ba Weter, husi ne’e ba Alor, dada oinsá buat sira-ne’e hotu tuir lei internasionál, la’ós fasíl,” nia dehan.
Xefe Governu ne’e fó lembra diskusaun FM entre Timor-Leste ho Austrália tanba Organizasaun Nasaun Unida (ONU) fó tempu tinan ida finaliza ikus finaliza no fulan neen ko’alia kona-ba Greater Sunrise.
Tuir nia, prosesu negosiasaun to’o agora hatudu ona progresu ne’ebé enkoraja, marka ho aprosimasaun ida ne’ebé fó prioridade ba ambiente amizade no entendimentu mútuo.
Prosesu negosiasaun ba fronteira marítima entre nasaun rua ne’e la’o tuir faze, hahú ho ronda dahuluk iha Dili iha fulan Agostu 2025, tuir fali ho ronda daruak iha Yogyakarta iha loron 08–10 Dezembru 2025. Enkontru Yogyakarta ne’e hetan partisipasaun husi Primeiru-Ministru Timor-Leste, Kay Rala Xanana Gusmào, hamutuk ho delegasaun rua ne’e nasaun sira.
Iha enkontru ne’e, parte rua ko’alia kona-ba aspetu tékniku no jurídiku no hatudu kompromisu maka’as atu hetan solusaun bazeia ba lei internasionál, partikularmente prinsípiu sira UNCLOS nian. Rezultadu konsidera pozitivu, ho entendimentu atu kontinua diálogu konstrutivu.
Enseramentu husi segunda volta ne’e marka ho asinatura akta husi xefe delegasaun nasaun ida-idak nian no troka lembransa sira hanesan símbolu amizade nian.
Jornalista : Hortencio Sanchez
Editór : Cancio Ximenes
