Xanana husu joven sira kria pás hodi selebra Paskua ho susesu
DILI, 02 Abríl 2026 (TATOLI)–Primeiru-Ministru, Kay Rala Xanana Gusmão, hateten Paskua fó lembra ba ema hotu kona-ba Jesus nia terus no mate iha krúz, nune’e husu joven sira tenke kria pás iha ida-idak nia moris hodi selebra Paskua ne’e ho susesu.
“Paskua ida-ne’e liuliu ba joven sira hadi’a-an uitoan ba, tanba Paskua fó lembra mai ita Jesus nia terus, dadur lori ba mate iha krúz. Nune’e mak joven sira hotu iha periodu Paskua ne’e kria pás iha ida-idak nia-an,” PM Xanana hateten ba jornalista sira iha Palásiu Prezidensiál Nicolau Lobato, Bairru Pite, ohin.
Nia dehan, joven no ema hotu atu haka’as-an hodi hatun tensaun iha família uma-laran sai ba to’o sosiedade atu kria pás iha Timor-Leste.
“Joven sira mak tenke hanoin didi’ak oinsá hatudu komportamentu ne’ebé di’ak iha komunidade. Ita hotu dejeza felíz Paskua ba povu tomak,” nia dehan.
Iha Paskua ida-ne’e, Xanana husu ba ema hotu atu reza, halo reflesaun atu hadi’a ida-idak nia an.
“Boa Paskua ba ita hotu,” Xanana hateten.
Jornalista : Hortencio Sanchez
Editór : Cancio Ximenes
