Sesta Santa nu’udár paixaun domin husi Kristu
BAUKAU, 03 Abríl 2026 (TATOLI)–Bispu Dioseze Baukau, Don Leandro Maria Alves konsidera selebrasaun loron Sesta Santa nu’udár símbulu paixaun domin husi Jezús Kristu tanba salva ema-nia sala.
Bispu Baukau Don Leandro Maria Alves esplika, Jezús nia terus to’o saran an voluntariamente ba mate la’ós Nia ema aat maibé tanba ema nia sala atu hetan liberdade no ksolok lalehan nian.
“Selebrasaun Sesta Santa ne’e lori ita haree paixaun Kristu nian ne’ebé hatudu obidiénsia laiha rezerva,” Don Leandro Maria Alves hateten iha Igreja Katedrál São José Vila Antiga, Baukau, Sesta ne’e.
Don Leandro Alves relata, selebrasaun Sesta Santa sinál atu sarani sira haree Maromak nia domin no laran luak ne’ebé hatudu liuhusi Jezús Kristu.
Aleinde ne’e, Jezús nu’udár saserdote boot tanba entrega an hodi sakrifika ba ema hotu nia salvasaun, hametin no haboot liután ema-nia fiar no esperansa ba iha Maromak.
Líder Igreja Katólika ne’e salienta Jezús leba to’o prega iha krús no transforma ai-krús ba sinál bensaun nian tanba husi krús mak sai símbulu bee-matan salvasaun ne’ebé sai ponte ba moris tuir Maromak nian domin, nune’e husu sarani sira atu loke laran no simu ema hotu-hotu nu’udár maun-alin nune’e kontinua reza ba pás iha nasaun liuliu mundu ne’ebé hasoru hela funu iha médiu orienta.
“Selebrasaun ohin ne’e tenke loke ita-nia fuan, halo ita sai ema laran luak no perdua-na’in,” Bispu akresenta.
Entretantu, selebrasaun Loron Sesta Santa hahú ho viasakra husi gruta Vila Santu António to’o Igreja Katedrál no ramata ho adorasaun ai-krús ne’ebé partisipa husi sarani Parókia Santú António Vila Antiga.
Jornalista: Natalino Belo
Editór: Xisto Freitas da Piedade
