Negosiante solisita ba MKI hadi’a merkadu tradisionál iha Berkoli
VENILALE, 06 Abríl 2026 (TATOLI)-Negosiante husu ba Ministériu Komérsiu no Indústria (MKI) atu hadi’a merkadu tradisionál iha Berkoli, ne’ebé lokaliza iha suku Uma Ana Ulo, postu administrativu Venilale, munisípiu Baukau.
Atividade iha merkadu ne’e hala’o semana ida dalarua, iha loron segunda no sesta, ne’ebé sai sentru ba rendimentu populasaun, liuliu ba agrikultór sira hodi fa’an sira-nia produtu lokál.
Merkadu ne’e akumula negosiante no kompradór sira husi suku Uma Ana Ulo, Uma Ana Iku, Badomori, Venilale Villa, Baukau Villa, Fatumaka, Gariuai no Ossú-Vikeke. Maibé, kondisaun atuál merkadu nian ki’ik, entaun la sufisiente atu negosiante sira fa’an iha merkadu laran no iha tempu udan difikulta tebes sira.
“Ami hakarak husu ba Governu atu hadi’a netik merkadu ne’e”, vendedora Julieta Freitas hateten ba Tatoli iha Berkoli, ohin.
Abitante Marçal de Sousa mós reforsa katak merkadu ne’e sai sentru ba populasaun sira hodi hetan rendimentu, presiza tebes atensaun husi parte relevante.
Tuir observasaun jornalista Tatoli iha terenu, merkadu ne’e lokaliza besik estrada ibun ho espasu ki’ik maski ema barak mak fa’an, nune’e presiza kria kondisaun.
Bazeia ba dadus, Venilale iha populasaun 23.324 ho ninia suku ualu hanesan Bado-hoó, Bahamori, Fatulia, Uai-oli, Uailaha, Uatu-hako, Uma Ana Iku, Uma Ana Ulo, no aldeia 35.
Iha poténsia ba setór agrikultura hanesan kuda hare, batar, fehuk- midar, ai-farina, koto, tomate, fehuk-roupa, repollu, kafé, mostarda, talas, lis, kamii, nuu, hudi, haas, saburaka, jambua, kulu no seluk tan.
Lian ne’ebé populasaun Venilale uza hodi halo komunikasaun mak hanesan tetun, uaimua, midiki no makasae.
Jornalista: Nelson de Sousa
Editora: Maria Auxiliadora
