KomJer PNTL Afonso oferese estratejia lima ba membru hodi mellora instituisaun
DILI, 07 Marsu 2026 (TATOLI)–Komandante Jerál (KomJer) Polísia Nasionál Timor-Leste (PNTL), Komisáriu Asistente Afonso dos Santos oferese área estratéjika lima importante nu’udar mata dalan ba membru sira atu serbisu tuir nune’e bele mellora di’ak liután serbisu instituisaun.
“Ita-nia misaun hanesan membru Polísia Nasionál mak atu garante orden públika, proteje vida no propriedade sidadaun sira, inklui asegura katak lei no regulamentu sira implementa ho loloos no justu. Iha oportunidade ida-ne’e, ha’u hakarak énfaze liután ba área estratéjika lima neʼebé tenke sai hanesan prioridade prinsipál iha ita-nia serbisu loron-loron,” Komisáriu Asistente Afonso dos Santos, hato’o iha nia intervensaun bainhira prezide parada jerál fulan-Abríl iha Kuartel Komandu Jerál PNTL, Kaikoli, Segunda ne’e.
Estratejia dahuluk mak polisiamentu komunitária, ne’ebé abordajen ne’e importante atu harii relasaun forte entre Polísia no komunidade.
Nia fó hanoin, nu’udar Polísia tenke sai hanesan parseiru ba povu, labele de’it hanesan forsa ne’ebé atua bainhira problema mosu, maibé tenke halo komunikasaun efetivu no kolaborasaun di’ak.
“Ita bele halo prevensaun krime ho maneira ne’ebé efisiente no sustentável,” nia akresenta.
Notísia relevante : EUA oferese ekipamentu instalasaun rede komunikasaun ba PNTL
Estratejia daruak mak investigasaun kriminál, ne’ebé Servisu Investigasaun tenke halo ho padraun profesionál ne’ebé a’as, respeita prinsípiu legalidade, objetividade no transpénsia.
Aleinde ne’e, kada kazu tenke trata ho seriedade, bazeia ba evidénsia no prosedimentu ne’ebé loos atu asegura katak bele hetan justisa no konfiansa públiku bele aumenta.
Estratejia datoluk mak kontrolu Tráfiku Rodoviária, hanesan seguransa iha estrada mak parte importante ida husi seguransa públika.
“Tanba ne’e, ita tenke hasa’e disiplina iha kontrolu tráfiku, implementa lei ho rigór no edukasaun ba sidadaun sira atu prevene asidente no salva vida ema barak,” nia katak.
Estratejia dahaat mak Komisáriu Asistente Polísia Afonso husu mellora Servisu Intelijénsia Polisiál.
Tuir KomJer, informasaun mak sai hanesan baze importante ba desizaun operasionál. Ita tenke reforsa kapasidade intelijénsia atu deteta ameasa sira ho sedu, prevene krime no garante estabilidade sosiál no seguransa nasionál.
“Servisu ida-ne’e presiza halo ho profesionalizmu, sijilu no responsabilidade a’as,” nia tenik.
Estratejia dalimak mak patrulla polisiál. Prezensa Polísia iha terrenu iha tempu hotu mak fatór importante ida atu prevene krime no fó sentimentu seguransa ba komunidade.
“Patrulla tenke halo ho planeamentu di’ak, regularidade no prontidaun atu responde ba situasaun ruma neʼebé mosu,” nia hato’o.
Komisáriu Afonso esplika, atu hametin área estratéjika sira ne’e sei labele realiza se laiha valór fundamentál sira iha ita-nia an. Tanba ne’e, tenke iha profesionalizmu atu halo serbisu ho kompeténsia, étika no integridade a’as, disiplina atu tuir regra, norma ho rigór no konsisténsia lealdade atu fiél ba instituisaun, lideransa no nasaun inklui responsabilidade atu prontu simu konsekuésia ba kada asaun no desizaun.
“Ita hotu tenke kompreende katak hanesan membru Polísia Nasionál Timor-Leste, la’ós de’it hanesan profisaun ida, maibé mós vokasaun ida atu serbisu ba povu no nasaun ho dedikasaun tomak. Konfiansa públiku ba instituisaun ne’e depende ba ita-nia atitude, integridade no maneira serbisu loron-loron,” nia subliña.
Jornalista : Natalino Costa
Editora : Julia Chatarina
