KFP: Instituisaun 94 halo ona reajustamentu salariál tuir rejime foun
DILI, 07 Abríl 2026 (TATOLI)-Komisaun Funsaun Públika (KFP) rejista liña ministerál no instituisaun públika sira hamutuk 94 maka halo ona reajustamentu salariál tuir dekretu-lei foun númeru 3/2026 kona-ba rejime kontratu termu sertu iha administrasaun públika.
Tuir Komisáriu ba Asuntu Planeamentu Forsa Traballu, José Telo Soares Cristóvão, KFP rejista liña ministerál no instituisaun públika sira hamutuk 113 maka presiza halo reajustamentu, maibé husi númeru ne’e 94 mak reajusta ona saláriu ba funsionáriu kazuál no termu sertu bazeia kompeténsia, esperiénsia serbisu no kualifikasaun akadémika tuir rejime foun.
“[Rejista] instituisaun 94 ho nia funsionáriu hamutuk rihun 19-resin, husi númeru ne’e Komisaun finaliza ona 17.475. Hanoin katak saláriu kuaze hothotu tama ona,” nia hateten ba jornalista sira iha edifísiu KFP, Matadouro, ohin.
Dirijente ne’e explika katak dokumentu husi funsionáriu hamutuk rihun ida-resin haruka filafali ba entidade idaidak, tanba iha reajustamentu la kumpri ba rejime foun, liliu kona-ba tabela salariál, ho nune’e husu sira atu ajusta filafali, entaun sira-nia saláriu suspende iha fulan-Marsu nian.
Ba sira ne’ebé mak entrega filafali, kuandu KFP verifika loos ona no ajusta tuir lei hodi prosesa, tanba Komisaun hala’o de’it tuir lei ne’ebé iha. Nia akresenta katak Komisaun ho Governu “laiha hanoin” atu impede ema-nia direitu.
“Ba instituisaun sira ne’ebé seida’uk haruka mai, Komisaun kontinua halo komunikasaun,” nia dehan.
José Telo Soares Cristóvão lembra katak rejime foun ne’e hahú vigór iha loron 03 fulan-Fevereiru no prazu durante loron 30. Durante períodu ne’e, KFP serbisu hamutuk ho Ministériu Finansa hodi halo reajustamentu no ba sira ne’ebé la kumpri, maka suspende saláriu fulan-Marsu nian.
Nia dehan iha instituisaun lubun-ida mai hato’o iha Komisaun katak, tinan kotuk sira iha problema, entaun tinan ne’e sira fó kontratu ba kazuál no termu sertu hahú husi fulan-Marsu ba oin, signifika sira labele simu saláriu iha fulan-Janeiru no Fevereiru.
Nia mós klarifika ba públiku kona-ba saláriu ba funsionáriu públiku no ajente administrasaun públika laiha problema kontinua simu normál kada fulan.
Primeiru-Ministru vizita KFP
Primeru-Ministru, Kay Rala Xanana Gusmão, tersa ne’e, hala’o vizita direita ba KFP, iha Matadoru, Dili hodi haree besik serbisu sira Komisaun nian.
Komisáriu KFP, José Telo Soares Cristóvão, hateten Komisaun hetan vizita husi Xefe Governu ida ne’e apoiu liután serbisu sira nian hodi lao ba oin tuir lei ne’ebé vigór, liu-liu implementasaun rejime foun ne’e.
Notísia relevante: Parlamentu preokupa ho ajustamentu kontratu termu sertu ne’ebé afeta ba saláriu funsionáriu
Jornalista: Nelson de Sousa
Editora: Isaura Lemos de Deus
