Sekretária Estadu Igualdade partisipa iha epizódiu foun programa “Página do Governo”
Ohin, loron 27 fulan-abríl tinan 2026, iha Palásiu Governu, Dili, epizódiu foun programa “Página do Governo”, ho partisipasaun husi Sekretária Estadu Igualdade, Elvina de Sousa Carvalho, ne’ebé ko’alia kona-ba polítika públika ba promosaun igualdade jéneru, prevensaun no kombate violénsia bazeia ba jéneru, no mós dezafiu no prioridade prinsipál sira iha setór ida-ne’e.
Sekretária Estadu Igualdade apoia Ministru Prezidénsia Konsellu Ministrus iha konsepsaun, ezekusaun, koordenasaun no avaliasaun ba polítika públika kona-ba igualdade jéneru, ne’ebé define no aprova ona husi Konsellu Ministrus. Ninia serbisu inklui hasa’e konxiénsia públiku kona-ba kestaun igualdade no inkluzaun, halakon diskriminasaun no violénsia hasoru feto no labarik sira, no mós promove partisipasaun feto sira-nian iha vida polítika no sosioekonómika.
Durante entrevista, aborda kestaun ne’ebé relasiona ho prioridade atuál sira hosi Sekretaria Estadu Igualdade, rezultadus ne’ebé alkansa ona iha hamenus dezigualdade jéneru, polítika hodi kombate violénsia bazeia ba jéneru, no mós dezafiu institusionál sira iha setór ne’e.
Programa “Página do Governo’’ lidera hosi Ministru Prezidénsia Konsellu Ministrus, Agio Pereira, programa ne’e prodús iha parseira ho Rádiu no Televizaun Timor-Leste (RTTL) no mós mídia nasionál sira, ho objetivu atu reforsa transparénsia governativa, prestasaun kontas no asesu sidadaun sira nian ba informasaun kona-ba desizaun no polítika prinsipál sira Ezekutivu nian.
“Página do Governo”, ho Nélia Chaves hanesan entrevistadora no Ika Moniz hanesan produtora ezekutivu, sai hanesan espasu ida ba diálogu institusionál, ne’ebé foka liu ba interese públiku, atu bele garante populasaun nia asesu ba asaun no desizaun prinsipál sira Ezekutivu nian. Programa ne’ebé grava hosi RTTL, hetan mós apoiu tékniku hosi ekipa mídia Gabinete Primeiru-Ministru, Prezidénsia Konsellu Ministrus, no hosi gabinete membru governu ne’ebé hetan entrevista.
Epizódiu ohin nian, ho Sekretária Estadu Igualdade, sei fó sai iha tempu badak iha RTTL no rede sosiál sira.
