Deker husu atensaun Estadu hodi valoriza veteranu sira
DILI, 03 Marsu 2026 (TATOLI)-Veteranu no atuál deputadu husi Partidu Kongresu Nasionál Rekonstrusaun Timorense (CNRT, sigla portugés), Domingos Augosto ‘Deker’, kontinua husu atensaun Estadu hodi fó rekoñesimentu ba veteranu no kombatente sira ne’ebé to’o agora seidauk hetan.
Nia apresia ho polítika Estadu ne’ebé atribui pensaun no seluk tan, no agora dadus kombatente rejistadu tinan 2009 ba faze daruak la’o daudaun, hein atu finaliza no ba futuru sei iha posibilidade loke tan rejistu foun.
“Hodi husu Estadu, atu kontinua atensaun ba kombatente balun ne’ebé to’o ohin loron seidauk hetan valorizasaun no rekoñesimentu iha tempu ukun-an ne’e”, nia hateten ba Tatoli hafoin partisipa komemorasaun Loron Nasionál Veternu ba-dasiak iha Komoro, ohin.
Nia husu kombatente hotu hala’o nia papél hodi kontribui nafatin ba prosesu dezenvolvimentu no moris di’ak povu nian.
Deker, iha esperansa ba oin ho ezisténsia agora iha ona Banku Veteranu nian ne’ebé reflete duni veternu uluk iha liña oin no ohin iha faze dezenvolvimentu nasaun no moris di’ak povu veternu asume nafatin responsabilidade todan.
“Ida-ne’e nu’udar papél importante, ida ne’ebé eroi no mártir sira husik hela ba veternu no kombatente, atu kontinua fó kontribuisaun ba prosesu konstrusaun Estadu no dezenvolvimentu nasaun liuhusi meiu idaidak hodi hamutuk ho Estadu no Governu”, nia dehan.
Hein katak banku ne’e bele serbí ema hotu, tanba ne’e hanesan fundu ida veteranu hahú, ba futuru Estadu fó apoiu másimu, nune’e veternu iha kondisaun atu kontribui liután.
Hodi husu jerasaun foun sira atu bantai tuir espíritu veternu sira-nia iha tempu ohin loron nian iha buat tolu-buka hatene istória veternu no kombatente libertasaun kona-ba prosesu ukun rasik-an, buka atu hadomi no halo tuir.
“Jerasaun foun atu idaidak hamoos nia konxiénsia, katak agora la’ós tempu ona atu kria grupu hodi hasoru grupu, maibé tempu husik buat hotu halo tuir sira-nia firmeza no sakrifísiu,nune’e jerasaun foun sira atu kontribui iha prosesu dezenvolvimentu nasaun”, nia apela.
Jornalista: Nelson de Sousa
Editora: Maria Auxiliadora
