HNGV klarifika bebé vasina ho kelen kanek iha rede sosiál ne’e informsaun HOAX
DILI, 31 Marsu 2026 (TATOLI)—Diretór Servisu Apoiu Diagnóstiku no Terapêutika HNGV, Vidal Lopes, klarifika informasaun ne’ebé lansa iha mídia sosiál kona ba bebé ida vasina no nia kelen kanek ne’e informasaun falsa ka Hoax.
“Informsaun ne’ebé lansa iha media sosiál kona-ba bebé ida vasina kidan kanek ne’e informasaun hoax. Depois informasaun mosu iha mídia sosiál ami tenta buka tuir to’o iha departamentu pediatria no sirurjia katak bebé ne’e naran iha livru rejistu laiha. Depois ami buka pasiente modelu hanesan ne’e laiha hotu, signifika pasiente ne’e la’ós akontese iha ne’e no la’ós akontese iha fasilidade sira sleuk maibé akontese iha nasaun seluk,” Vidal Lopes hateten ba jornalista sira iha HNGV, Bidau, ohin.
Nia hatutan, HNGV hanesan instituisaun públiku no sai fasilidade saúde Governu nian prontu simu nafatin simu krítika sira-ne’e.
“Krítika atu hadi’a ita-nia an. Ami nakloke ba públiku sira no la alerjia ba kritika, tanba ita presiza mós ba kontrolu sosiál katak buat ne’ebé mak ladi’ak atu ita kontinua hadi’a,” nia dehan.
Nia relata, HNGV ema hotu nia presiza tane aas hodi fó fiar nafatin ba povu katak no labele lakon konfiansa povu mak iha HNGV iha nafatin.
“Dalabarak ita halo tauk iha mídia sosiál ne’e hoax ho liafuan sira-ne’ebé mak loos, entaun publiku konsumu informsaun sira-ne’e sira prefere halo tratamentu tradisionál. Bainhira tratamentu tradisionál mak ba ona faze grave mak foin mai halo tratamentu iha HNGV ne’e ita labele salva,” nia hateten.
Tanba ne’e, nia husu ba entidade hotu-hotu, HNGV nafatin simu kritika no HNGV kontinua hadi’a buat ne’ebé mak ladi’ak, HNGV rekoñese ida-ne’ebé mak sala dehan sala, ida-ne’ebé mak loos ne’e HNGV rekoñese loos.
Jornalista : Felicidade Ximenes
Editór : Cancio Ximenes
