Japaun Komprometidu apoia PNTL ba prevensaun krime transnasionál
DILI, 05 Marsu 2026 (TATOLI)–Embaixadór Japaun iha Timor-Leste, Yasushi Yamamoto, kompromete sei serbisu hamutuk ho Polísia Nasionál Timor-Leste (PNTL) atu prevene krime transnasionál no jogu ilísitu scam online.
“Ha’u mai hasoru Ministru Interiór, ami ko’alia liu kona-ba haforsa setór seguransa, liliu kooperasaun bilaterál entre nasaun rua hodi hametin serbisu seguransa iha futuru. Loos duni, entre Japaun no Timor-Leste, ita iha kooperasaun n di’ak tebes iha área Polisiál nian hanesan Unidade Polísia Marítima (UPM) inklui mós polísia komunitária,” Yasushi hato’o hafoin enkontru ho Ministru Interiór, Francisco da Costa Guterres iha ninia knaaar fatin, Vila Verde, foin lalais ne’e.
Notísia relevante : KM aprova tratadu estradisaun ASEAN hodi kombate krime transnasionál
Diplomata ne’e hateten, Governu Japaun iha kompromisiu atu serbisu hamutuk promove konseitu seguransa hodi asegura dezenvolvimentu ekonómiku iha nasaun.
“Ami iha mós projetu ida-ne’ebé agora hala’o hela no ohin ami diskute atu kontinua halo komunikasaun di’ak, nune’e bele hametin kooperasaun di’ak,” nia akresenta.
Japaun interesadu atu promove kooperasaun rejionál hodi kombate krime no tráfiku umanu husi autór rede krime organizadu sira.
“Timor-Leste mós sai ona membru ASEAN, entaun presiza ajusta mós lista krime transnasionál ne’ebé envolve husi jogu online ilegál, krime sibernétika, nune’e Japaun hakarak atu suporta Timor-Leste iha área ida-ne’e,” nia katak.
TATOLI
