MI seidauk finaliza estatutu Ensinu Superiór Siénsia Polísia
DILI, 06 Marsu 2026 (TATOLI)—Ministériu Interiór (MI) daudaun ne’e seidauk finaliza estatutu Ensinu Superiór Siénsia Polísia.
“Ministériu Interiór sei elabora hela, hotu tiha sira haruka mai ha’u mak ha’u foin pronúnsia ba ita-boot sira,” ministru Interiór, Francisco da Costa Guterres, hato’o ba jornalista sira hafoin partisipa iha reuniaun Konsellu Ministru, iha edifísiu Ministériu Finansa, Aitarak-laran, Sesta ne’e.
Iha sorin sorin seluk, Komandante Komandu Pesoa Formasaun, Superintendente Xefe Polísia, Arquimino Ramos, hateten, Komandu Polísia Nasionál Timor-Leste (PNTL) hein hela estatutu Ensinu Superiór Siénsia Polísia husi Ministériu Interiór, kuandu ministériu finaliza ona bele loke ona Ensinu Superiór Siénsia Polísia.
Notísia relevante : Instalasaun Institutu Superiór Siénsia Polisia kuaze ramata
“Bainhira estatutu ne’e hetan ona aprovasaun husi Konsellu Ministru ne’e ita hahú ona. Tanba vaga ba eskola ofisiál nia ne’e iha ona, ne’e iha 100 vaga. Ida-ne’e sei la’o, bainhira estatutu EnsinuSuperiór Siénsia Polísia ne’e aprova ita avansa ona,” nia akresenta.
Arquimino dehan, pedidu lisensiamentu ba estabelesimentu ensinu ne’e manda ona ba Ministériu Ensinu Superiór Siénsia no sira aseita ona.
“Entaun ita loke ona formasaun ba ofisiál nune’e sira bele eskola hodi hetan baxarelatu iha Siénsia Polísia,” nia katak.
Jornalista : Natalino Costa
Editora : Julia Chatarina
