Prezidente Ramos-Horta haforsa relasaun bilaterál TL-Azerbaijaun
DILI, 13 Marsu 2026 (TATOLI)—Prezidente Repúblika, José Ramos-Horta, iha marjen husi Fórum Globál Baku XIII, hala’o enkontru bilaterál nivel aas ho Primeiru-Ministru Azerbaijaun, Ali Asadov.
Tuir nota ne’ebé TATOLI asesu husi media Palásiu Prezidensiál haktuir katak, enkontru estratéjiku ne’e fó plataforma valioza ida ba líder rua ne’e atu fahe perspetiva sira kona-ba panorama internasionál no rejionál atuál, inklui prosesu pás ne’ebé la’o hela iha Cáucaso Súl no dezafiu urjente sira kona-ba seguransa no estabilidade globál.
Durante enkontru ne’e, Prezidente Ramos-Horta no Primeiru-Ministru Asadov esplora dalan konkretu sira atu haforsa liután relasaun bilaterál entre Timor-Leste no Azerbaijaun. Sira-nia diskusaun foka ba espansaun kooperasaun iha setór diplomátiku, ekonómiku no edukativu.
Inisiativa xave sira-ne’ebé ko’alia inklui esplora oportunidade investimentu mútuo, estabelese programa bolsa estudu akadémiku nian no promove parseria institusionál ne’ebé besik liu, liuliu iha formasaun diplomátika atu apoia Timor-Leste nia dezenvolvimentu ne’ebé la’o hela no prioridade integrasaun rejionál.
Aleinde interese bilaterál sira, líder rua ne’e destaka importánsia vitál husi koordenasaun kontínua iha enkuadramentu multilaterál sira-nia laran liuliu Nasaun Unida no Movimentu Nasaun sira la Alinñadu (MNA).
Liuhusi kolaborasaun ativu iha plataforma internasionál sira-ne’e, nasaun rua ne’e reitera sira-nia interese mútuo ne’ebé maka’as atu haburas relasaun ne’ebé besik liu no benefísia malu hodi avansa objetivu komún sira kona-ba diplomasia, dezenvolvimentu no kooperasaun globál.
TATOLI
