Prezidente Repúblika informa ba Parlamentu kona-ba viajen bá Indonézia
DILI, 23 Marsu 2026 (TATOLI)-Prezidente Repúblika, José Ramos-Horta, informa ba Parlamentu Nasionál kona-ba ninia viajen privada bá Indonézia.
Xefe Estadu hato’o karta ba órgaun lejizlativa ne’e bazeia ba Konstituisaun artigu 80 númeru 3 katak sei auzente iha territóriu nasionál entre loron 20 to’o 24 Marsu ne’e inkluziva.
Hodi informa mós dezlokasaun ne’e prevista enkontru ho eis-Prezidente Repúblika Indonézia, Megawati Sukarno Putri, iha segmentu konvite ne’ebé Xefe Estadu envia ona iha 11 Fevereiru liubá atu konvida eis-Prezidente Repúblika Indonézia ne’e vizita Timor-Leste iha tinan ne’e.
Iha sorumutu entre Ramos-Horta no Megawati, iha loron 23, iha Jakarta, aborda relasaun estratéjika entre parte rua.
Haktuir husi komunikadu ne’ebé Tatoli asesu, enkontru ida-ne’e reafirma parseria ne’ebé kle’an no dura entre nasaun viziña ne’e, relasaun ida ne’ebé harii iha tinan barak nia laran ho respeitu mútuu, rekonsiliasaun, no kompromisu partilladu ba estabilidade rejionál.
Ramos-Horta no Megawati troka hanoin kona-ba habelar konetividade entre povu no garante katak momentum relasaun bilaterál kontinua fó benefísiu tanjivel ba país rua.
Jornalista: Nelson de Sousa
Editora: Maria Auxiliadora
