Promosaun ba Ofisiál PNTL sei hala’o iha Sábadu ne’e
DILI, 18 Marsu 2026 (TATOLI)–Ministru Interiór, Francisco da Costa Guterres, informa, promosaun ba ofisiál Polísia Nasionál Timor-Leste (PNTL) sei hala’o iha Sábadu ne’e.
“Ohin loron 21 Marsu agora iha Sentru Formasaun Polísia tuku 09:00 dadeer ita sei iha promosaun ba Ofisiál Superiór. Serimónia promosaun ba ofisiál sira hotu Primeiru-Ministru mak sei prezide,” Ministru hato’o ba Jornalista sira iha Palásiu Governu, Kuarta ne’e.
Ofisiál Superiór Ofisiál sira ne’ebé hetan promosaun deviza hamutuk 63, ne’ebé husi Superintendente Asistente sira uluk balun serbisu iha instituisaun durante tinan 16, balun tinan 13 no balun tinan 10.
“Iha promosaun ne’e ita haree didi’ak ninia modalidade sira ne’e,” nia akresenta.
Ministru esplika, razaun Governu liuhusi Komandu PNTL halo promosaun ba Ofisiál Superiór sira tanba depoizde Ministériu Interiór no Komandu PNTL halo analize ba estrutura katak iha Superintendente Xefe balun ba iha Komisáriu Asistente tanba balun atu ba reforma ona, depoizde tinan barak sira dedika-an hodi serbí instituisaun.
“Sira-nia pozisaun ne’e sira nia postu nunka hetan promosaun. Tanba ne’e mak ita halo promosaun ida-ne’e para depoizde tinan oin ba reforma,” nia tenik.
Notísia relevante : MI no Komandu PNTL halo diskusaun ba promosaun trazitóriu nível ofisiál superiór
Ministru afirma, promosaun deviza ba Ofisiál Superiór PNTL ne’e tanba iha ofisiál superiór PNTL balun mak tama ba idade reforma.
“Iha purvolta na’in-lima, ida tama ona ba reforma mas iha grupu balun mak agora ne’e hetan atu ba adidu, balun adidu ona no balun tenke okupa kargu sira ne’ebé mak iha ne’e, tenke duni presiza Komisáriu Asistente. Tanba ne’e ita tenke halo promosaun ba sira hodi ba aliña ba estrutura ne’ebé mak iha ona,” nia katak.
Governante ne’e hatutan liután katak, ba Ofisiál Superiór sira ne’e hamutuk na’in-10 sei okupa kargu foun ba vaga iha Komisáriu Asistente.
“Tanba iha vaga sira ne’e komplesu uituan, ita bolu dehan katak vaga sira ba estrutura ne’e komplesu uituan, entaun presiza Komisáriu Asistente foun ida ba asegura fatin sira ne’e mak ita tau. Ita halo promosaun ne’e bazeia ba estrutura PNTL ne’ebé mak tuir lei orgánika,” nia hato’o.
Jornalista : Natalino Costa
Editora : Julia Chatarina
