STAE Baukau hakarak finaliza produsaun kartaun biométriku antes eleisaun munisipál

BAUKAU, 05 Marsu 2026 (TATOLI)—Sekretariadu Tékniku Administrasaun Eleitorál (STAE) Baukau pretende finaliza prodús kartaun biométriku ba eleitór sira antes realiza eleisaun kámara munisipál.

Diretór STAE Baukau, Natividade Freitas Guterres esplika atu atinje alvu, STAE Baukau kontinua simu atendimentu kada loron ne’ebé fahe ba kategoria tolu hanesan halo foun kartaun ba eleitór foun, renovasaun ba eleitór tuan no troka dadus.

“Ita sura loron ida halo atendimentu ba ema na’in-50 resin ne’e to’o tinan ida fulan-neen ita bele ona atinje tuir alvu,” Diretór STAE Baukau infroma ba TATOLI iha ninia kna’ar fatin, Vila Nova, Baukau, Kinta ne’e.

Natividade relata, tuir planu, STAE mós sei aumenta funsionáriu liuhusi halo rekrutamentu ba ofisiál operadór na’in-ualu nune’e kontinua halo atendimentu direta ba postu administrativu ualu ne’ebé sei realiza iha fulan-Maiu tinan-ne’e.

Nia subliña, tuir kalkulasaun, totál votante ne’ebé eziste iha Munisípiu Baukau purvolta rihun 107 resin iha-ne’ebé bainhira kada loron halo atendimentu ba votante na’in-50 ba leten sei atinje alvu ne’ebé planeia ona antes realizasaun eleisaun kámara munisipál no eleisaun prezidente repúblika ne’ebé tuir kalendáriu sei realiza iha 2027.

“Bainhira ramata ona, eleitór sira sei utiliza hotu kartaun biométriku iha eleisaun maibé ne’e konforme desizaun iha leten,” Natividade Freitas akresenta.

Jerente ne’e hateten prosesu atendimentu kontinua la’o mezmu atualmente fasilidade hanesan reborn, blanku no film stoke out iha-ne’ebé sei iha faze aprovizionamentu no bainhira ramata kompañia responsavel distribui ba kada munisípiu.

Entretantu, tuir dadus, totál eleitór ne’ebé iha ona kartaun biométriku hamutuk 40.159 korresponde pursentu 37.44 husi totál eleitór hamutuk 107.261 iha-ne’ebé seidauk serteja tanba posibilidade kahór ho eleitór ne’ebé lakon vida inklui dupla kartaun.

Jornalista: Natalino Belo 

Editór: Xisto Freitas da Piedade