Tribunál aplika Prizaun Preventiva ba JD ligadu ho krime omesídiu agravadu iha Goulolo
DILI, 10 Marsu 2026 (TATOLI)–Tribunál Judisiál Primeira Instánsia Dili (TJPID), Tersa ne’e, liuhusi despaisu ikus ba prosesu primeiru interrogatóriu, deside aplika medida Prizaun Preventiva ba arguidu ho insiál JD, ne’ebé halakon Fernando Madeira ho kódigu ‘Nando Udan Ben’ nia vida, iha área Erbuti, Suku Goulolo, Postu Administrativu Lete-Foho, Munisípiu Ermera, iha Sesta (06/03).
Arguidu na’in-tolu MD, JD, no AS mai iha Tribunál hodi submete ba interrogatóriu judisiál dahuluk iha Segunda (09/03).
Ministériu Públiku (MP) promove arguidu sira ho krime omesidiu agavadu tuir artigu 139 husi Kódigu Penál Timor-Leste no krime Arma Branka tuir artigu 2º nú. 2 alinea a) nomós artigu 200 nú.1 husi Lei nú.5/2017 kona-ba Rejime Jurídiku Relativu Prátika Arte-Marsiál, Rituál, Arma Branka, Rama Ambon, ba alterasaun dalimak husi Kódigu Penál.
Juiza Turnu, Ana Paula Fonseca halo tiha identifikasaun ba arguidu na’in-tolu no ikus mai deside tama ba alegasaun.
Iha alegasaun husi parte MP ne’ebé reprezenta husi Prokuradór, Ricardo Leite, husu Tribunál atu aplika medida Prizaun Preventiva ba arguidu na’in-tolu. Enkuantu, parte Defeza husu ba Tribunál atu aplika medida Aprezentasaun Períodika.
Notísia relevante : Tribunál julga kazu omesidiu niglijente ne’ebé halakon Helena nia vida
Rona tiha alegasaun, ikus mai Juiza Turnu Ana Paula Fonseca, hatun despaisu hodi deside aplika medida Prizaun Preventiva ba arguidu ho inisiál JD tanba konsidera iha indísiu forte.
Enkuantu, ba arguidu na’in-rua seluk MD no AS, Tribunál liuhusi despaisu ikus deside aplika medida Aprezentasaun Períodika atu aprezenta-an iha Eskuadra Polísia ne’ebé hela besik ba kada fulan-ida dala-ida.
Prosesu ne’e prezide husi Juiza Turnu Ana Paula Fonseca, MP reprezenta husi Prokuradór Ricardo Leite, no arguidu sira hetan asisténsia legál husi Defensór Públiku estájiariu, Mateus Pinto.
Kazu ne’e akontese iha loron 06 Marsu 2025, ne’ebé problema nia hun mosu tanba diskusaun tanba rai, vitima baku uluk arguidu JD. Tanba ne’e, arguidu JD ba foti katana iha dapur hodi taa dala-tolu iha vítima nia ulun no taa dala-barak iha vítima nia kakorok hodi rezulta vítima Fernando Madeira mate iha fatin akontesimentu.
Vítima hanesan mane foun, enkuantu arguidu na’in-tolu ne’e, ida hanesan vítima nia banin mane no na’in-rua seluk hanesan vítima nia tiu, tanba vítima hola sira-nia feton.
Jornalista : Natalino Costa
Editora : Julia Chatarina
