EhD na’in-57 iha Bobonaru partisipa ona formasaun kona-ba letra Brille
BOBONARU, 01 Abríl 2026 (TATOLI) – Asosiasaun Halibur Defisiénsia Rejiaun Oeste (AHDRO) fó ona formasaun letra Brille ba ema ho efisiensia (EhD) na’in-57 hodi bele hatene lee no hakerek.
Diretór-Ezekutivu AHDRO, Sebastião de Fátima dehan formasaun ne’e ba liu ema ho defisiénsia matan, maibé la taka dalan ba tipu defisiénsia sira seluk ne’ebé hakarak aprende.
Notísia relevante: EhD matan iha Oekusi benefísia kapasitasaun letra Braille no teknolojia dijitalizasaun
“Iha 2018 ita estabelese formasaun letra Brille. Husi tinan hirak mai to’o 2025 ne’e ema ho defisiénsia hamutuk 57 mak aprende letra Brille ne’ebé fasilita husi AHDRO nia rekursu”, nia dehan iha Tunubibi, ohin.
Dirijente ne’e relata katak husi totál formandu hirak ne’e ADHRO na’in-10 kontinua estudu iha organizasaun defisiensia sira iha nasionál hanesan Uniaun Defisiénsia Matan Timor-Leste (UMDTL) no seluk tan, inklui iha Universidade Nasionál Timor Lorosa’e. Enkuantu na’in-47 sei kontinua aprende no balun sai ona staff iha organizasaun ne’e.
“ADHRO hakarak halibur ema ho defisiénsia sira mai aprende no aumenta sira-nia abilidade tanba barak mak hetan stigma no diskriminasaun. Ami lori sira mai atu hatudu katak ema defisiénsia mós iha abilidade atu halo buat hotu”, nia dehan.
Maski iha defisiénsia fizíku, Julião Barros, hakarak aprende letra Brille tanba bele kompleta malu ho maluk defisiénsia matan sira iha kualker atividade.
“Maski ami diferente, maibé ha’u hakarak aprende liután ho kolega defisiénsia matan sira. Se ha’u la komprende letra Brille entaun difísil ba ami atu komprende malu”, nia afirma.
AHDRO durante ne’e halo atividade sira hanesan advokasia ba Governu no organizasaun relevante sira kona-ba asuntu inkluzaun defisiénsia no halo atividade agrikultura hanesan kuda-modo, batar no produtu seluk ne’ebé hetan apoiu husi parseiru sira.
AHDRO eziste iha 2015 ho misaun atu fó advokasia ba ema ho defisiénsia, liuliu ba sira-neʼebé hela iha área remota, susar atu asesu informasaun kona-ba saúde, edukasaun no selu ktán.
ADHRO iha sentru tolu ne’ebé eziste iha Bobonaro, Likisá no Kovalima ho nia membru 600-resin.
Notísia relevante: AHDRO preukupa edifísiu Autoridade Bobonaru laiha asesiblidade ba EhD
Jornalista: Sergio da Cruz
Editora: Maria Auxiliadora
