Ekipa selesaun Nasionál Futsál dezloka bá Tailandia
DILI, 04 Abríl 2026 (TATOLI) – Jogadór Selesaun Nasionál Futsál hamutuk na’in-14 ho sira-nia ofisiál, sábadu ne’e, halo despedida ho Estrutura Federasaun Futeból Timor-Leste (FFTL) no Assosiasaun Futsál Timor-Leste antes dezloka bá nasaun Tailandia hodi kompete iha jogu ASEAN Futsál Championship, ne’ebé sei realiza fulan-Abríl tinan ne’e.
“Ha’u husu nafatin ba jogadór sira atu kontinua fó sira-nia totalidade iha jogu sira. Maibé ha’u fiar sira iha espíritu boot atu defende no foti ita-nia nasaun nia naran,” Prezidente FFTL Nilton Gusmão hateten ba jornalista sira hafoin despede ho jogadór futsál sira.
Nia dehan, Timor-Leste hasoru nasaun mesak forte de’it, maibé labele lakon esperansa kontinua hatudu jogu ne’ebé di’ak.
“Ita hasoru nasaun mesak forte de’it, sira-nia preparasaun la hanesan ho ita-nian, maibé labele hanoin hanesan ne’e, ita-nia preparasaun mós naton ona atu hasoru sira. Maibé rezultadu iha futeból ne’e labele dehan de’it tenke manán, maibé ita tenke halo husi prosesu hotu atu manán, ita tenke hatudu husi buat ne’ebé diferente katak ita hah’u organiza hahú di’ak ona,” Nilton katak.
Molok ne’e, AFTL kolabora ho FFTL, hili Efraim Ferdinand Bawole nu’udar Treinadór Prinsipál Selesaun Nasional Futsál Timor-Leste ba kompetisaun ASEAN Futsal Championship 2026.
Kompetisaun ne’e sei realiza iha Nonthaburi, Thailandia, husi loron 05-12 fulan-Abríl 2026, no Selesaun Nasional Futsál TL okupa iha Grupu A hamutuk ho nasaun ASEAN seluk mak hanesan, Thailandia, Vietname, no Myanmar.
Lista jogadór
Domingos dos Santos husi klube Ramelau Fc, Neodinho Guterres, Fc Coelho, Rivaldo Ribeiro, Ramelau Fc, Eufrasio Soares, Caesar Dante, Natalizio Sang, Ramelau Fc, Aristides Pires, Fc Coelho, António da Silva, Mauputar Fc, João Paul, Ramelau Fc, Joel Fernandes, Ramelau Fc, Bendito Ramos Mauputar Fc, Miguel Fernandes, Fc, Coelho, Leonildo Torres, Caesar Dante Fc, Evinho Guterres, Ramelau Fc, Ruben Faria, Mauputar Fc.
Jornalista: Hortencio Sanchez
Editór: Florencio Miranda Ximenes
