Embaixadora Natália simu orientasaun husi Xefe Estadu antes hala’o misaun iha CPLP
DILI, 01 Abríl 2026 (TATOLI)–EmbaIxadora Timor-Leste ba Komunidade Nasaun Sira Ko’alia Lian Portugés (CPLP-sigla portugés), Natália Carrascalão, kuarta ne’e, hasoru malu ho Prezidente Repúblika José Ramos-Horta, antes dezloka ba Portugál hodi hala’o misaun diplomasia.
“Ha’u mai hasoru Prezidente Repúblika tanba antes semana ida tan ha’u sei husik Timor-Leste hodi ba Portugál hala’o misaun Embaxadora iha CPLP, entaun ha’u mai simu orientasaun antes aranka ba Portugál,” Embaixadora Natalia hateten ba jornalista sira hafoin remata enkontru ho Xefe Estadu.
Nia dehan, iha enkontru ne’e ko’alia mós kona-ba oinsa hala’o servisu ho di’ak iha CPLP no tau mós prioridade Timor-Leste nian iha organizasaun referida.
“Orientasaun ne’ebé simu husi Prezidente mak asuntu komun CPLP nian, iha link barak mak bele halo, sesaun hotu ne’ebé mak ha’u bele halo iha ne’ebá CPLP tanba Presidente Repúblika hanesan diplomata ida-ne’ebé esperiente. Tanba ne’e, ha’u tenke rona saida mak Prezidente orienta, ha’u ba halo kna’ar hanesan Embaixadora Timor-Leste ba CPLP,” Embaixadora ne’e tenik.
Natalia Carrascalão daudaun ne’e hala’o knaar nu’udar Embaixadora Timor-Leste ba CPLP hodi troka embaixadora Laura Abrantes ne’ebé misaun termina ona.
Timor-Leste asume prezidénsia CPLP iha fulan-Dezembru, pozisaun ida-ne’ebé fote husi Guiné-Bissau hafoin simeira ida husi Xefe Estadu sira ho Governu iha sekuénsia husi golpe Estadu iha nasaun ne’ebé hatún Umaro Sissoco Embaló no interompe prosesu eleitorál, hodi impede divulgasaun husi rezultadu eleisaun jeral sira iha fulan-Novembru.
Jornalista : Hortencio Sanchez
Editór : Cancio Ximenes
