EUA oferese ekipamentu instalasaun rede komunikasaun ba PNTL

DILI, 01 Abríl 2026 (TATOLI)–Estadu Unidu Amérika (EUA) liuhusi Embaixada iha Dili oferese osan ho montante millaun $2,8 hodi halo instalasaun ba rede komunikasaun rádiu emerjénsia nasionál hodi responde ba situasaun emerjénsia ne’ebé akontese iha Timor-Leste.

Sekretáriu Estadu Protesaun Sivil, Domingos Mariano Reis, agradese no apresia ba Governu EUA, ba nia kontribuisaun, kompromisu no solidaridade ba Governu Timor-Leste.

“Rádiu komunikasaun hanesan parte ida husi rekursu importante ba komunikasaun sira hodi asegura resposta ba emerjénsia no katástrofe iha territóriu nasionál tomak,” Sekretáriu Estadu hato’o durante intervensaun iha ámbitu serimónia entrega ekipamentu instalasaun, iha Kuartél Jerál Polísia nasionál Timor-Leste (PNTL), Kaikoli, Kuarta ne’e.

Bazeia ba Lei Seguransa Nasionál, Autoridade Protesaun Sivil hola parte iha sistema seguransa nasionál.

Governante ne’e konsidera ekipamentu ne’ebé simu husi parseiru hodi garante sustentabilidade komunikasaun sira, preparasaun hasoru dezastre no resposta ba situasaun emerjénsia.

“Lori povu Timor nia naran, ami agradese tebes ba Governu Estadu Unidu Amérika, liuliu povu Amérika, ba dezenvolvimentu Timor-Leste, ami konta ho Estadu Unidu Amérika,” nia akresenta.

Notísia relevante: Governu Austrália entrega ekipamentu téknikál ba MI apoia Servisu Migrasaun

Iha fatin hanesan, Segundu Komandante PNTL, Komisária Asistente Natercia Eufrásia Soares, konsidera inisiativane’e la’ós de’it investimentu iha infraestrutura maibé hanesan símbolu ida ba parseria, solidariedade no kompromisu hamutuk atu proteje seguransa no bem-estar povu Timor-Leste.

“Hodi naran PNTL nian, hau hato’o agradesimentu boot ba Embaixada Estadu Unidu Amérika nian ba kontribuisaun generozu ida-ne’e. Investimentu hamutuk millaun $2,8 ne’e sei fó kapasidade di’ak liu ba ami atu responde emerjénsia, halo koordenasaun no komunikasaun entre instituisaun sira,” nia katak.

Segunda Komandante rekoñese servisu importante husi Programa Dezenvolvimentu Polísia Timor-Leste Austrália (TLPDP) ne’ebé halo fundasaun ba atualizasaun, ne’ebé hanesan esforsu atu hatudu forsa kooperasaun internasionál hodi enfrenta dezafiu komun sira.

Tanba ne’e, Natércia iha esperansa rede ida-ne’e sei sai instrumentu importante ba Ajénsia Protesaun Sivil, PNTL no FALINTIL-Forsa Defeza Timor-Leste (F-FDTL) atubele halo komunikasaun lalais no konfiável liu iha tempu krize. Iha situasaun dezastre naturál ka emerjénsia umanitária, kapasidade atu halo koordenasaun ho di’ak hodi bele salva vida no proteje komunidade.

Nune’e, serimónia ohin atu hatudu responsabilidade hamutuk atu asegura katak instituisaun sira preparadu no reziliénte.

“Ami mós onra ho prezensa husi líder sira no parseiru importante, inklui Sua Exelénsia Sekretáriu Estadu ba Protesaun Sivil, Sua exelénsia Xefe Defeza F-FDTL, Diretór Ajénsia Protesaun Sivil, no Major General Chevalier husi Rhode Island National Guard. Prezensa ita-boot sira hatudu importánsia parseria ida-ne’e no relasaun forte entre instituisaun no nasaun sira,” nia louva.

Nune’e ba futuru PNTL reafirma nia kompromisu atu kontinua hametin kooperasaun ho parseiru hotu.

“Ami fiar liuhusi diálogu kontínuu, respeitu mútua no vizasaun hamutuk, ita bele harii Timor-Leste ida-ne’ebé seguru liu no reziliénte. Inisiativa ida-ne’e bele sai fundasaun ba kooperasaun ne’ebé kle’an liu iha tinan sira mai,” nia katak.

Marku importante

Iha fatin hanesan, Vise-Xefe Misaun Embaixada EUA, Rodney LeGrand, konsidera inisiativa ne’e hanesan marku importante ida iha parseria bilaterál.

“Rede ida-ne’e hanesan rede dahuluk iha Timor-Leste, sistema ida ne’ebé dedikadu, reziliénte, no modernu ne’ebé dezeñadu atu garante katak bainhira akontese dezastre, Timor-Leste bele responde hodi apoia ninia povu,” Rodney deskreve.

Nota mós katak, iha tempu krize, resposta lalais ne’e bele salva moris. Tanba ne’e rede rádiu ne’e bele ajuda fó resposta ba rekuperasaun ne’ebé hala’o husi Autoridade Protesaun Sivil, PNTL, no F-FDTL durante inundasaun, rai-monu, no emerjénsia médiku.

“Estadu Unidu Amérika orgullu bele oferese investimentu millaun $2,8 ida-ne’e, maibé realizasaun ida-ne’e la’ós ami-nia mesak. Ninia susesu iha abut iha kolaborasaun ho ita-nia parseiru sira,” nia afirma.

Rodney LeGrand dehan, Ba parseiru timoroan sira, rede ida-ne’e hanesan testamentu ida ba vizaun husi nasaun ne’ebé reziliente liután. Tanba ne’e, kompromisu sira atu profisionaliza resposta ba dezastre ho asegura katak sidadaun sira hetan protesaun no uza rekursu di’ak.

Agradese mós ba antigu australianu tanba bele hatudu serbisu hamutuk ne’ebé reflete kompromisu kle’an no trilaterál ba estabilidade no seguransa iha rejiaun Indo-Pasífiku.

“Ba implementadór sira iha CSE Crosscom, ami rekoñese impaktu ne’ebé indústria lori hodi realiza momentu importante ida-ne’e atu avansa Timor-Leste nia reziliénsia hasoru dezastre. Ami apresia kontribuisaun husi ita-boot sira-nia esforsu,” nia hato’o.

Rodney LeGrand konsidera projetu ne’e hanesan investimentu diretu ba seguransa sidadaun timoroan ne’ebé harii iha istória naruk ida kona-ba inisiativa reziliénsia ba dezastre, hahú husi apoia F-FDTL ho formasaun no matenek husi Unidade Militár EUA hanesan Guarda Nasionál Rhode Island, to’o treinamentu ba PNTL hodi hadi’a ninia kapasidade ba hamoos materiál esplozivu.

“Esforsu hirak-ne’e ho objetivu atu garante katak Timor-Leste iha kapasidade atu lidera rasik ninia operasaun no resposta ba dezastre no proteje ninia povu,” nia katak.

Tuir Rodney LeGrand, kondisaun ohin marka inísiu ba instalasaun ekipamentu krítiku sira no pasu xave ida iha parseria. Liuhosi USINDOPACOM no Guarda Nasionál Rhode Island, EUA fó apoiu ba Timor-Leste nia profisionál sira kona-ba responde ba dezastre hodi garante katak rede foun ida-ne’e integra tomak iha sira-nia esforsu nasionál.

“Hamutuk, ita harii Timor-Leste ida neʼebé seguru liu, reziliénte liu, no preparadu ho di’ak liután,” nia dehan.

Jornalista      : Natalino Costa

Editora           : Julia Chatarina