Komandu PNTL halo avaliasaun molok halo rekrutamentu ba membru foun
DILI, 09 Abríl 2026 (TATOLI)—Komandu Polísia Nasionál Timor-Leste (PNTL) sei halo avaliasaun molok hakat ba rekrutamentu membru foun.
“Agora iha parte internalmente iha Komandu ita sei halo avaliasaun ba nesesidade depoizde hetan ninia finalidade foin bele deside. Bainhira membru ruma reforma tenke iha rekrutamentu foun para bele troka sira-nia fatin, entaun ida-ne’e hau seidauk bele komentáriu klaru, sei iha faze ida no halo hela avaliasaun ba nesesidade ne’e maibé depoizde ramata ita sei públika sai para nune’e publiku mós akompaña,” Segundu Komandante Jerál PNTL, Komisária Asistente Natércia Eufrasia Soares Martins, hato’o ba Jornalista sira iha ninia knaar fatin, Komandu Jerál PNTL, Kinta ne’e.
Tanba ne’e, seidauk iha ajenda no kalendáriu klaru tanba presiza halo avaliasaun ba nesesidade.
“Ita-nia esperansa katak tinan ida-ne’e tenke halo rekrutmentu foun, tinan ida-ne’e ha’u la hateten monu iha sá fulan no sá data, maibé tinan ne’e tenke halo rekrutamentu,” nia akresenta.
Notísia relevante : PNTL nia oan na’in-71 okupa númeru kiik iha lista rekrutamentu membru foun
Segunda Komandante PNTL afirma, rekrutamentu tenke realiza tanba nu’udar nesesidade instituisaun.
“Ita sei hasa’e filafali proposta ba Gorvenu para oinsá bele fó apoiu liuliu investimentu iha ninia prosesu kapasitasaun ka kursu ida-ne’e,” nia katak.
Natércia dehan, kona-ba númeru ne’ebé sei rekruta depende ba nesesidade ne’ebé sai prioridade ba tinan-ne’e, nu’udar preparasaun ba eventu lubuk ida ne’ebé sei hasoru.
“Ita sei hasoru kampaña no Eleisaun Jerál sira, ita sei hasoru eventu internasionál, entaun ita tenke iha pesoál sira ne’ebé kapasitadu, pesoál sira ne’ebé preparadu duni atu hasoru eventu sira, atu nune’e bele lori, kontrola, fó seguransa ne’ebé hakmatek ba ita-nia sidadaun. Ita-nia komunidade mós bele kontinua ezerse sira-nia direitu sira hanesan normál,” nia katak.
Jornalista : Natalino Costa
Editora : Julia Chatarina
