Komunidade solisita MOP konstrui estrada ligasaun entre Vikeke Vila no Aldeia Loa
VIKEKE, 02 Abríl 2026 (TATOLI)—Komunidade Aldeia Loa, Suku Uma-Ki’ik, Postu Vikeke Vila, Paulino Soares Pinto, solisita Servisu Obra Públika Munisípiu Vikeke reabilita estrada no ponte ne’ebé husi Aldeia Loa liga ba Postu Vikeke Vila.
“Ami komunidade suku tolu hanesan Suku Uaimori, Karaubalu no Suku Uma-Ki’ik mak hela iha Baria-Laran totál populasaun purvolta na’in-1000-resin, maibé kondisaun estrada no ponte mak sai difikuldade ba ami. Tan ne’e, ami husu MOP konstrui ponte no estrada, atu fasilita ami bele asesu,” abitante Paulino Soares Pinto ba TATOLI iha Postu Vikeke Vila, Kinta ne’e.
Nia salienta, iha tempu udan mota tun, komunidade labele sai ba postu no difikulta mós estudante sira asesu ba eskola.
“Problema ami enfrenta tinan barak ona, maibé Governu seidauk rezolve. Tan ne’e, ami hakarak husu Governu rezolve emerjénsia ba ami-nia preokupasaun ida-ne’e,” nia hato’o.
Nia relata husi Postu Vikeke Vila bá Baria-Laran distánsia metru 500, maibé ponte kotu tinan barak nune’e kareta sira tenke liuhusi mota, maibé tempu udan mota tun movimentu labele la’o.
Ba preokupasaun ne’e, Sekretáriu Asuntu Sosiál no Organizasaun Komunitária Munisípiu Vikeke, Acasio de Sousa, hateten autoridade anota ona, tan ne’e bainhira enkontru sei aprezenta komunidade nia preokupasaun ne’e ba konsellu koordenasaun munisipál hodi tau ba prioridade.
Entretantu, Diretór Servisu MOP Munisípiu Vikeke, Casildo Gomes haktuir daudaun ne’e tékniku sira halo hela levantamentu ba estrada no ponte sira inklui mós preokupasaun komunidade Loa nian.
“Preokupasaun sira-ne’e ita sempre tau ba atensaun oinsá bele rezolve, maibé ita la’o ho neineik. Ida-ne’e mak ha’u hakarak responde komunidade nia preokupasaun sira,” nia tenik.
Jornalista: Vitorino Lopes da Costa
Editór: Xisto Freitas da Piedade
