Ministru Interiór fó kompeténsia tomak ba Komandu Jerál PNTL rekruta membru foun
DILI, 01 Abríl 2026 (TATOLI)–Ministru Interiór, Francisco da Costa Guterres, hateten, Governu sei fó kompétensia tomak ba Komandante Jerál Polísia Nasionál Timor-Leste (PNTL), Komisáriu Asistente Afonso dos Santos, atu haree kona-ba rekrutamentu membru efetivu foun.
“Depois mak ita haree, ha’u hanoin ne’e laiha problema, ne’e sira mak entende liu ida-ne’ebá, ne’ebé nia sei hakarek karta ba ha’u, depois mak ha’u sei lori mai Konsellu Ministru,” Ministru Francisco Guterres hato’o ba Jornalista sira hafoin reuniaun Konsellu Ministru, iha Palásiu Governu, Kuarta ne’e.
Nune’e, hafoin Páskua ne’e mak sei halo preparasaun ba rekrutamentu membru foun PNTL.
“Hein lai. Ha’u hanoin Páskua liu tiha lai. Paskua liu ita komesa hahú fali,” niaakresenta.
Governante ne’e garante Ministériu Interiór (MI) sei la foti kompeténsia tomak husi responsável sira ne’ebé sei haree ba rekrutamentu, nune’e Komandu Jerál mak sei haree.
“Nunka iha Ministeriu Interior, foin lalais mós la’ós iha Ministériu Interiór nia okos, iha Komandu PNTL nia okos ami kria de’it Komisaun Supervizaun atu haree ida-ne’e deit,” nia katak.
Notísia relevante: KomJer PNTL Afonso prefere rekruta membru foun 750
Minitru mós kompromete katak sei la halo intervensaun ba Komandante Jerál PNTL nia serbisu.
“Sim, ne’e loos ka ita labele politiza fali PNTL, mas kestaun serbisu ne’ebé ligasaun ho institusionál ne’e tenke iha soke nia ko’alia ne’e labele ba enterven diretamente Polísia ida membru ida-ne’e ba husu fali ida-ne’ebá sai, hau-nia eskoltu ida-ne’e labele,” nia subliña.
Ministru hatutan: “Ita hakarak Polísia tenke profisionál, se ita hakarak Polisia ida-ne’ebé mak kumpre regra no la’o tuir regras, labele rona abiru, se lae ne’e Polísia ne’e la bá oin. Sei lae. Ida-idak la’o tuir nia regras ne’e ga! Iha lei iha, ba PNTL tutela ba Ministru Interiór sim, iha ninian irarkia ne’e iha ninian regra no prosedimentu, ne’ebé nia liga ne’e liuhusi prosesu ne’e, labele liga oin seluk, ida-ne’e maka ita lakohi, ne’ebé ita la’o tuir normál.”
Ministru mós dehan, rekrutamentu membru foun PNTL sei hala’o iha Sentru Formasaun Polísia.
“Ida uluk mós lae, agora mos ita sei la halo. Tanba ita entrega hela ba Komandu Jerál, agora hanesan foin lalais rezolusaun sai tiha ona katak nomea juri husi internasionál balun ho tan de’it Polísia Nasionál Timor-Leste, Ministériu Interiór, Funsaun Públika ne’ebé ita sei konstitui juri ne’ebé hanesan ne’ebá ita entrega. Tanba ita konstitui juri, automátikamente tenke iha Sentru Formasaun,” nia katak.
Governante ne’e klarifika, prosesu rekrutamentu la’o tuir despaixu, juri no Komisaun Supervizaun ne’e Ministériu Interiór mak haree, enkuantu restu ne’e Komandu mak hala’o.
Jornalista : Natalino Costa
Editora : Julia Chatarina
