Padre Guilhermino “Banati tuir Jesus nia jestu iha Kinta-Feira Santa nu’udar servidór ne’ebé haraik-an”
DILI, 02 Abríl 2026 (TATOLI)—Padre Pároku Motael, Guilhermino da Silva, hateten, Misa Kinta-Feira Santa labele sai hanesan selebrasaun de’it, maibé tenke sai nu’udar fiar ida atu sarani di’ak ida kuda metin iha espíritu fé ninian, katak nu’udar sarani tenke iha pasiénsia, haraik-an no nu’udar servidór ida.
“Biar ita mai Misa Domingu, ita mai iha Igreja hela de’it, maibé ita laiha pasiésia hodi perdua ita-nia maluk seluk, ida-ne’e mós ladún di’ak. Tanba ne’e, husu atu nu’udar sarani tenke banati tuir Na’i Jesus nia jestu sira ne’ebé nia hatudu iha kalan Kinta Feira Santa, katak nu’udar Na’i no servidór ne’ebé haraik-an hanesan servidór ba nia apóstulu sira,” Padre Guilhermino iha nia umília bainhira prezide Misa Kinta-Feira Santa iha Igreja Motael.
Biban ne’e, nia husu sarani sira tenke kuda espíritu Na’i Jesus ne’ebé nia hatudu liuhusi jestu nu’udar servidór ba nia ema.
“Ohin ida-ne’e Misa Kinta-Feira Santa, Na’i Jesus nia jestu ne’ebé iha ohin kalan ida-ne’e importante iha ita-nia moris, saran nia-an nu’udar Na’i hodi salva ita-nia sala. Iha aktu ida-nia fase eskolante sira-nian ain, ida-ne’e hatudu Jesus Kristu nu’udar servidór no haraik-an. Ida-ne’e atu husu ba ita atu ba banati tuir Na’i Jesus nia aktu ne’e,” nia akresenta.
Notísia relevante : Komandu PNTL preparadu asegura selebrasaun Misa Páskoa
Nia dehan, nu’udar sarani tenke halo hahalok di’ak iha família no sosiedade liuhusi tulun malu, perdua malu, haraik-an no umilde.
“Tanba ne’e mak iha misa ida-ne’e la’ós hanesan misa ne’ebé nu’udar selebrasaun eukaristia, maibé Na’i Jesus husu ita atu halo tuir ne’ebé iha sagrada eskritura hateten halo tuir ha’u bá. Ita mós tenke halo tuir hodi tau iha prátika loroloron iha sosiedade no família,” Padre fó hanoin.
Padre Parokia Motael husu ba sarani sira atu hadomi família, hanesan Na’i Jesus halo ba nia eskolante sira, hakneak hodi fase ain nu’udar sinál dedikasaun sakrifika-an atubele fó moris ba ema seluk.
“Nia menjen mak ne’e imi halo hanesan ne’e ba imi-nia maun-alin sira, ida-ne’e labele sai hanesan liafuan de’it, mas hanesan prátika. Ita labele fiar de’it mas ita-nia fiar ida-ne’e tenke ser hahalok loroloron liuhusi serbisu, doasaun no sakrifika-an,” Padre katak.
Selebrasaun Misa Kinta-Feira Santa iha Igreja Motael taka ho adorasaun Santísima Trindade.
Misa iha Igreja Motael hahú tuku 17:00 lorokraik, akompaña ho udan-bootmaibé la hamate sarani sira-nia fé nu’udar Katólika hodi kontinua mai partisipa iha misa to’o ramata.
Jornalista : Natalino Costa
Editora : Julia Chatarina
