Páskua mak mistériu fé no esperansa ba foin-sa’e
DILI, 03 Abríl 2026 (TATOLI)–Pe. Joel Casimiro Pinto haktuir iha reflesaun páskua ne’ebé ho tema “fiar no esperansa” katak páskua mak mistériu fé no esperansa ba foin-sa’e sira.
“Páskua mak mistériu fé no esperansa ba foin-sa’e sira. Tanba ne’e, ita selebra ita-nia fé liuhusi páskua no esperansa ita kontinua nafatin esforsu katak Jezús Kristu nia prezensa ba daruak nian ne’ebé sei mai filafali maibé ita lahatene loos. So ita mak mate hasoru malu ho Nia,” Atuál Reitór Universidade Katólika Timorense (UCT-sigla portugeza) dehan iha estúdiu TATOLI, Faról, Dili, Kinta (02/04).
Pe. Joel Pinto hatutan esperansa mós bele haree hosi foin-sa’e no família sira. Kuandu haree família naksobu, foinsa’e baralla. Ida-ne’e labele haree ba nia negativu de’it maibé haree mós ba parte hanoin pozitivu mak bele iha mudansa ba esperansa.
“Entaun, páskua sempre sai fundamentu ba moris di’ak nian tanba moris hias, moris foun, transformasaun foun iha Kristu moris hias. Páskua ne’e sei inspira foin-sa’e sira atu sai sarani di’ak, fiar nafatin iha Nai Maromak. Ida-ne’e mak ita-nia esperansa ba sira. Ita-nia esperansa di’ak no sei sai di’ak liután ba tinan-ne’e no tinan sei mai,” Reitór UCT hateten.
Biban ne’e hakarak hato’o mensajen ba foin-sa’e sira tanba foin-sa’e sira mak sai hanesan Jezús Kristu joven ida, Nia mate maibé nia moris hias.
Jornalista: Osória Marques
Editór: Xisto Freitas da Piedade
