CVTL Vikeke apoiu ekipamentu antesipatóriu ba Suku Nahareka Ossú
VIKEKE, 05 Marsu 2026 (TATOLI)—Koordenadór Kruz Vermella Timor-Leste (CVTL-sigla portugeza) Filiál Munisípiu Vikeke, Severina Marques da Silva, informa CVTL apoiu ekipamentu antesipatóriu nian ba Suku Nahareka, Postu Administrativu Ossú, hodi tulun autoridade bainhira mosu dezastre naturál.
“Kona-ba apoiu ekipamentu antesipatóriu nian ne’ebé ami apoiu ba Suku Nahareka, ho objetivu tulun ita-nia autoridade lokál sira bainhira musu udan boot no anin boot karik sira bele uza hodi tranzmite informasaun intensidade klíma nian ba ita-nia komunidade hodi antesipa,” Severina ba TATOLI iha Postu Vikeke Vila, Kinta ne’e.
Koordenadora CVTL Munisípiu Vikeke relata fasilidade antesipatóriu ne’ebé CVTL filiál Munísipiu Vikekek entrega ba Suku Nahareka kompostu husi auto-falante (TOA) boot unidade tolu (3) ho riin besi, batre (Accu) no painél solár.
“Apoiu sira-ne’e ami hetan husi parseiru Catholic Relief Services (CRS) liuhusi programa antesipatóriu ba dezastre naturál nian,” nia esplika.
Severina informa CVTL filiál Munisípiu Vikeke mós oferese ona formasaun sira hanesan primeiru sukoru no simulasaun dezastre naturál ba autoridade lokál Suku Nahareka no komunidade hodi antesipa dezastre naturál akontese.
CVTL filiál Munisípiu Vikeke ho totál funsionáriu hamutuk na’in-sia (9) ne’ebé ba program rua hanesan funsionáriu haat (4) koloka ba programa nutrisaun, na’in-rua (2) ba programa antesipatóriu dezastre naturál no na’in-tolu ba administrasaun.
Suku Nahareka totál aldeia hamutuk lima, populasaun hamutuk na’in-2.225 no uma-kain hamutuk 600.
Jornalista: Vitorino Lopes da Costa
Editór: Xisto Freitas da Piedade
