PN solisita ba IGEADI halo intervensaun urjente ba ponte Bulobu
DILI, 10 Marsu 2026 (TATOLI)-Reprezentante povu iha uma fukun Parlamentu Nasionál (PN) husu ba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADI, I.P) atu halo intervensaun urjente ba ponte Bulobu, iha área Samutaben, suku Manapa, postu administrativu Kaikalu, munisípiu Bobonaru, ne’ebé ameasadu kotu.
Deputada Carminda Carlota husi Partidu Kongresu Nasionál Rekonstrusaun Timorense (CNRT, sigla portugés) hateten iha kontaktu eleitorál iha baze haree kondisaun atuál ponte ne’e iha risku atu kotu, ne’ebé sei fó impaktu ba sirkulasaun transporte públiku no privadu bá Kailaku.
“Husu Ministériu Obra Públika atu trata asuntu ne’e ho urjénsia, no mós ba IGEADI dezloka ekipamentu pezadu temporariamente hodi normaliza estrada alternativa ho forma ne’ebé la prejudika atividade komunidade iha terrenu”, nia levanta liuhusi reuniaun plenária Parlamentu, ohin.
Deputada CNRT, Maria Gorumali Barreto, reforsa katak ponte ne’e iha situasaun ne’ebé ameasadu no husu Governu atu foti solusaun lalais. “Se ponte ida-ne’e mak kotu, entaun laiha movimentu husi Kailaku mai Maliana no husi Maliana mai Kailaku kotu totál”, dehan.
Vise-Ministru ba Asuntu Parlamentár, Adérito Hugo da Costa, rejista preokupasaun ne’e no sei hato’o ba entidade relevante atu tau atensaun.
Relasiona ho kestaun ne’e, jornalista Tatoli tenta konfirma ho Prezidente IGEADI, Ana Paula da Cruz, liuhusi via whatssap maibé seidauk hetan resposta.
Notísia relevante: https://hadomi.cloud/2026/03/04/komunidade-kailaku-husu-solusaun-diak-ba-ponte-bulobu/
Iha reuniaun plenária Parlamentu, ohin, reprezentante povu sira kontinua husu atu tau atensaun rápida ba infraestrutura ne’ebé hetan danifika hanesan ponte, estrada, harii muru protesaun no hadi’a kondisaun estrada aat ne’ebé difikulta asesu iha tempu udan.
Jornalista: Nelson de Sousa
Editora: Maria Auxiliadora
