MS halo fumigasaun ba uma kain 6.440 iha territóriu
DILI, 02 Abríl 2026 (TATOLI)—Diretór Nasional Edukasaun Promosaun iha Ministeeriu Saúde, Jaime Belo, informa hahú husi Janeiru to’o 01 Abríl ne’e, Ministeriu Saúde fahe abate ba uma kain 35.721 no halo fumigasaun ba uma-kain hamutuk 6.440 iha territóriu.
“Intervensaun atu kombate dengue ne’e mak liuhusi fahe abate no halo fumigasaun komunidade nia uma, Seluk mak halo ona edukasaun promosaun saúde hamutuk 479.720 no pesoál saúde ne’ebé mak tama sai uma hamutuk 96.161 inklui fahe brosura,” Jaime Belo inform aba jornalista sira iha nia kna’ar fatin MS, Kaikoli, ohin.
Nia dehan, uma kain ne’ebé mak MS fahe ona abate iha Munisípiu Aileu hamutuk 358, Ainaru uma kain 3.391, Ataúru uma kain 1.370, Baukau uma kain 3.453, Bobonaru uma kain 1.952, Kovalima uma kain 1.416, Dili uma kain 13.191, Ermera uma kain 1.301, Lautein uma kain 414 Liquisa uma kain 1.360, Manatutu uma kain 703, Manufahi uma kain 1.012, RAEOA uma kain 1.371 no Viqueque uma kain 3.389 hamutuk 35.721.
Nia hateten, abate sira-ne’ebé mak durante tama mai hamutuk kilo 1000 no munisípiu ne’ebé mak simu barak liu mak Dili 300kg, tuir mak munisípiu Baukau 64kg, Ermera 64kg no munispiu sira seluk ne’e 54kg.
Ba iha fomigasaun hamutuk litru 2200 ba munisípiu ne’ebé mak simu barak mak munisípiu Dili hamutuk litru 950, depois tuir mak munisípiu Baukau litru 85, Ermera litru 85 no munisípiu sira seluk litru 70.
“Agora daudaun estoke abate mamuk ona iha nasionál maibé ba munisípiu sira sei iha ba iha malation litru 300, maibé iha munisípiu sira sei iha estoke. Tuir informasaun ne’ebé mak ami rona katak horisehik abate tama ona iha INFPM halo ona pedidu ba sira atu halo distribui ba armajen. Nune’e munisípiu sira-nia pedidu mai karik, ami atu fahe ba sira, falta malation mak seidauk to’o maibé ida ne’e mós MS halo konkursu públiku no tempu badak sei to’o halo intervensun ba kazu dengue,” nia dehan.
Nia esplika, abate ne’ebé mak fahe ba munisípiu 14 mak ba munisípiu Aileu kilo 54, Ainaru kilo 54, Ataúru kilo 32, Baukau kilo 64, Bobonaru kilo 54, Kovalima kilo 54, Dili kilo 300, Ermera kilo 64, Lautein kilo 54, Likisá kilo 54, Manatutu kilo 54, Manufahi kilo 54, Vikeke kilo 54 no RAEOA kilo 54.
Agora fomigasaun iha Munisípiu Aileu litru 70, Ainaru litru 70, Ataúru 50, Baukau litru 85, Bobonaru litru 70, Kovalima litru 70, Dili litru 950, Ermera litru 85, Lautein litru 70, Likisá litru 70, Manatutu litru 70, Manufahi litru 70, Vikeke litru 70 no RAEOA litru 70.
Atividade edukasaun promosaun daudaun ne’e la’o hela, ekipa sira ho karreta tama sai uma hodi aviza ba iha fatin risku sira, entaun ekipa sira-ne’e halo mós atividade mobile klinika no siska.
“Komunidade balun rejeita informasaun sira-ne’ebé mak ekipa sira tama sai bairru fahe informasaun kona ba kazu dengue no balun la simu atu tau abate iha sira-nia bee no balun mós la simu atu rega fomigasaun ba sira nia uma. Razaun sira-nian mak dehan bee sira utiliza loro-loron ne’e sira hola, entaun sira lakohi tau abate ba. Depois mos iha ne’eba ferik katuas balun moras iis boot, entaun sira lakohi halo fomigasaun, ida-ne’e akontese iha Dili laran nomós munisípiu sira,” nia dehan.
Jornalista : Felicidade Ximenes
Editór : Cancio Ximenes
