MS fó oportunidade ba profisionál saúde na’in-25 hala’o estudu iha UNTL
DILI, 04 Marsu 2026 (TATOLI)—Diretora Nasionál Rekursu Umanu iha Ministériu Saúde, Mary Christavaria Lopes, informa iha tinan ne’e Ministériu Saúde fó oportunidade ba profisionál saúde hamutuk na’in-25 hodi kontinua hala’o sira-nia estudu ba Pos-Graduasaun iha Universidade Nasionál Timor-Leste durante tinan rua (2).
“Bazeia ba asina akordu ka MoU ne’ebé mak hahú iha 26 Marsu 2024, entre INSPTL, PHD no mós Hospitál Nasionál Guido Valadares ho Ministériu Saúde atu fasilita kursu Pos-Graduasaun ba profisionál saúde sira hodi prienxe ba fasilidade saúde iha Timor-Leste iha tinan ne’e, Ministériu Saúde sei fó tan oportunidade ba profisionál saúde na’in-25 atu kontinua sira-nia estudu iha Pos-Graduasaun iha UNTL durante tinan rua,” Mary Christavaria Lopes hateten ba jornalista sira iha nia kna’ar fatin, Kaikoli, ohin.
Bazeia apoiu akordu ida-ne’e hahú kedas iha tinan kotuk no kada tinan Ministériu Saúde hakarak atu hahú forma ona Medisina Família Integradu hodi koresponde ba nesesidade kuidadu saúde primaria nian.
“Ita-nia alvu ba iha 2030, ita nia hakarak atinje 150 pesoa, hodi bele prienxe iha kada fasilidade saúde sira nivél sentru saude iha territóriu,” Mary Christavaria Lopes dehan.
Tuir alvu husi Ministériu Saúde kada tinan tenke iha profisionál saúde hamutuk na’in-25, maibé iha tinan kotuk iha de’it na’in-23 mak dadaun ne’e kontinua hela sira-nia estudu.
“Ita hahú iha tinan kotuk, ita hakarak hahú ona ho 25 pesoa tuir alvu ne’ebé maka ita hakarak, maibé prosesu rekrutamentu, selesaun dokumentu to’o final, ita hetan kandidatu na’in-24 maibé na’in-ida (1) la pasa no na’in-ida (1) rezigna an. Entaun iha kandidatu na’in-23 ne’ebé mak agora daudaun sira iha hela faze segundu ano ba iha prosesu aprendizajen nian,” nia dehan.
Nia haktuir, iha tinan ida-ne’e Ministériu Saúde hakarak propoin 25 kandidatu ba vaga refere, nune’e bainhira to’o iha 2030 bele prienxe ona alvu ne’ebé mak iha.
“Kada tinan ho ita-nia alvu to’o iha 2030 ne’e, ita bele hetan 150 Medisina família Integradu ne’ebé mak iha kada sentru saúde sira,” nia esplika.
Kona-ba ninia prosesu, nia dehan, ne’e normál no baibain Ministériu Saúde halo kolaborasaun ho Universidade Nasionál Timor-Leste no daudaun ne’e sira hahú halo pedidu ba UNTL atu bele loke ba vaga refere.
“Ami submente ona pedidu ba UNTL atu bele loke vaga ba iha prosesu rekrutamentu sira, orsida ami fasilita de’it iha selesaun dokumentus no infomasaun sira-ne’e mós ita hato’o ona ba Diretór Munisípiu sira. Rekezitu sira-ne’ebé mak fó sai iha ne’ebá ami públiku ona iha pájina Palásiu da Cinzas, depois halo selesaun dokumentu liuhusi ekipa de juri sira-ne’ebé mak kompostu husi parte relevante sira deside hamutuk iha Instituisaun haat, orsida selesaun hotu depois mak ita tama ba prosesu kontínuasaun,” nia esplika.
Nia haktuir, durasaun ba iha ne’e estudu ne’e iha fulan 24 ka tinan rua nian no sira-ne’e ba iha Post-Graduasaun.
“Vaga ne’e rasik ita públiku ona ita hanoin to’o iha dia 31 de Marsu kandidatu hotu-hotu, submente ona. Ita-nia alvu, ita hakarak ba iha tinan ida-ne’e ba iha Munisípiu 11, SSM Ataúru, Aileu, Ainaru, Bobonaru, Baukau, Kovalima, Ermera, Lautein, Likisáa, Manufahi, Vikeke ezeptu liu Dili. Tanba ita hatene katak Dili ne’e Sentru bele asesu hotu ba ospitál nasionál, entaun ita fó uluk prioridade ba Munisípiu ne’ebé mak ami mensiona ne’e vaga 25 novaga ne’e ita públika fó tempu too iha 31 de Marsu. Maibé bainhira ita haree aplikante sira husi Munisípiu relevante sira la hetan informasaun klaru mak sira la aplika, ami nafatin sei fó oportunidade atu sira bele aplika,” nia dehan.
Jornalista : Felicidade Ximenes
Editór : Cancio Ximenes
