TL atu sai uma-na’in ba ASEAN presiza estrutura administrativa ne’ebé di’ak
DILI, 05 Marsu 2026 (TATOLI)–Ministru Negósiu Estranjeiru no Kooperasaun (MNEK), Bendito dos Santos Freitas, hateten Timor-Leste presiza estrutura administrativa ida di’ak ho ema ne’ebé iha kapasidade ba servisu tékniku, tanba daudaun ne’e TL okupa hela pozisaun hanesan Prezidénsia ba Nasaun Sira Ko’alia Lina Portugés (CPLP) no iha tinan 2029 sei sai uma-na’in ba ASEAN
Tanba ne’e, nia hatutan, nia husu ba Prezidente Repúblika, José Ramos-Horta, hodi nomeia Jesuína Maria Ferereira Gomes ba Vise- Ministru Negósiu Estranjeiru no Kooperasaun (MNEK) nian.
“Ita agora lidera hela Prezidensia CPLP, tinan 2029 ita sai uma-na’in ba ASEAN, entaun ita presiza estrutura administrasaun ida ho ema ne’ebé kapasidade hodi haree ba servisu tékniku sira, entaun Vise-Ministra Negósiu Estranjeiru nia sei foku liu oinsa haree servisu administrasaun, jestaun finanseira no atende mós kona-ba polítika,” Ministru Bendito hateten bainhira akompaiña Vise-MNEK Jesuína Gomes simu pose husi Prezidente Ramos-Horta iha Palásiu Prezidensiál, Nicolau Lobato Dili, kinta ne’e.
Nia dehan, MNEK presiza tan Vise ida oinsa atu halo konsolidasaun servisu administrativu no reforma institusionál.
“Ita tenke iha konseitu ida katak, MNEK tenke sai Ministériu ida ideál, tenke performe ho di’ak, profesionalizmu, ho dignidade, kredibilidade. Ha’u fó referensia ida katak, bainhira ha’u hasoru malu ho Ministru Negósiu Estranjeiru Singapura nian, nia dehan, MNEK Timor nian labele komete erru kiik ida, ida ne’e katak ita presiza servisu administrativa ida di’ak no presiza tan Vise ida hodi apoiu. Maske iha ona Vise ida haree ba asuntu ASEAN nian, maibé nia mós servisu maka’as loos tanba enkontru ASEAN nian tinan ida dala 1000 liu, entaun ita presiza tan ema ida no ohin simu ona pose fiar katak ba oin sei servisu hamutuk ho di’ak,” Bendito dehan.
Nia hatutan, dalabarak ajenda multilaterál barak iha nasaun li’ur, Ministru rasik ho Vise-Ministra Asuntu ASEAN ba hotu, laiha ona estrutura másimu ida iha Ministériu, ho nune’e mak Ministru rasik propoin ba Primeiru-Ministru no husu ba Prezidente Repúblika konkorda nomeia Jesuína Gomes ba Vise-MNEK ho mandatu 2026-2028.
Durante serimónia toma pose, Vise-Ministra atuál, Jesuína Gomes, hametin nia kompromisu hodi jura ba Maromak, povu no ba nia-aan katak sei serví de’it povu no nasaun ne’e.
“Ha’u Jesuína Maria Fereira Gomes jura ba Maromak, ba povu ba ha’u nia-an, kumpre no lealidade ba funsaun ne’ebé atribui, kumpre no kumpre de’it ba Konsetituisaun no Lei sira no dedika ha’u-nia enerjia no kapasidade sira ba servisu hotu-hotu,” Jesuína hateten iha nia juramentu bainhira simu pose husi Prezidente Ramos-Horta.
Notísia Relevante: Prezidente Ramos-Horta nomeia Jesuína Gomes sai Vise-MNEK
Jornalista : Hortencio Sanchez
Editór : Cancio Ximenes
