BTL monta kanalizasaun provizóriu-hatuur tanke bee-moos iha área afetadu alargamentu estrada
DILI, 02 Abríl 2026 (TATOLI)—Bee Timor-Leste, Empreza Públika (BTL, E.P) konsege monta ona kanalizasaun no hatuur tanke bee-moos provizóriua ba komunidade afetadu alargamentu estrada iha área Bekora, Kamea, Bekusi Sentru no Bekusi Pura.
Prezidente BTL, E.P, Gustavo da Cruz, hateten durante prosesu alargamentu estrada afeta tebes ba kanalizasaun bee-moos ba komunidade maibé BTL konsege monta kanalizasaun provizóriu ba iha área afetadus sira hanesan iha Bekora, Bekusi Sentru, Bekusi Pura, My Friend, maibé iha parte My Friend nian sira konsege monta fali ona kanalizasaun permanente.
Dirijente ne’e hatuta,n alargamentu ne’e mós ajuda ona BTL implementa uitoan-uitoan ba dezeñu detalladu ne’ebé mak uluk halo ona husi konsultan sira sistema bee iha Dili nian.
“Entaun agora daudaun kanalizasaun ne’ebé ami tau ajusta kedas tuir planu ne’ebé iha. Ami hatene katak komunidase barak loos mak halerik tebes ho situasaun id- ne’e, tanba ne’e dalaruma ami partilla informasaun ba autoridade lokál sira hodi hatutan ba komunidade atu kalma. Maibé iha área balun hanesan Bekusi, Kamea no Kakeu Laran ami hatuur tanke bee ba sira,” Prezidente BTL ne’e informa ba Agência Tatoli, ohin.
Maibé mós, nia dehan, normalmenta iha mudansa tanba ekipa tékniku sira hala’o servisu maka’as iha terenu hanesan monta kanalizasaun bee, koa kotu (korte) kanalizasaun ilegál, monta kontadór no halo levantamentu dadus ba komunidade ne’ebé seidauk asesu bee-moos.
Jornalista : Alexandra da Costa
Editór : Cancio Ximenes
