MOP fó xamada dala-rua ba empreza Mar Vermelho ne’ebé abandona projetu
BOBONARU, 05 Marsu 2026 (TATOLI) – Ministériu Obra Públika (MOP) fó karta xamada dala-rua ba empreza lokál Mar Vermelho atu finaliza projetu reabilitasaun estrada rurál iha Porema, suku Atudara, postu administrativu Kailaku, munisípiu Bobonaru, tanba daudaun projetu paradu.
Koordenador Infraestrutura MOP destakadu munisípiu Bobonaru, Fernando de Fátima, hateten katak projetu reabilitasaun estada la la’o dezde fulan-Outubru 2025 no serbisu fíziku foin atinje de’it 46%.
Fernando esplika katak projetu ne’e paradu tanba problema interna kompañia nian, maibé parte Obra Públika hanesan na’in ba projetu kontinua ezije empreza bele kontinua no finaliza serbisu.
Notísia relevante: Marsu, MOP implementa projetu reabilitasaun estrada rurál kilómetru 16 iha Bobonaru
“Sira cor tiha pound concrete kilómetru ida hanesan depois para até agora. Parte Obra Públika fó ona karta Xamada dala-rua ba kompañia atu kontinua halo projetu ne’e, maibé seidauk iha resposta. Ami-nia ekipa fó hateten beibeik mós sira seidauk book serbisu”, nia informa ba jornalista sira.
MOP Bobonaru mós identifika katak estrada ne’ebé reabilita ona ne’e iha pontu ida rua mak komesa nakfera.
Obra ne’e implementa iha loron 22 fulan-Jullu tinan 2024 ho valór kontratu hamutuk $234.628,69.
Notísia relevante: Distánsia no estrada aat kauza bebé lakon vida
Jornalista: Sergio da Cruz
Editora: Maria Auxiliadora
