MS sei haruka profisionál Saúde na’in-hitu hala’o estudu iha Fiji
DILI, 04 Marsu 2026 (TATOLI)—Ministériu Saúde haruka profisionál saúde na’in-hitu ba hala’o estudu iha Fiji, iha 14 Marsu 2026, iha área espesilidade hanesan Pediatria, Psikiatria, Sirujia Orál, Oftamolojia, Jinekolojia, Medisina Interna, Emerjénsia, Dermatolojia, Sirujia Jeál no Anestesia.
“Ita hahú prosesu ne’e husi kedas tinan kotuk fazeadamente ba preparasaun, entaun ita iha kandidatu pur volta 46 ne’ebé mak aplika ba iha vaga refere. Vaga ne’e depois aplikante sira aplika ba iha vaga, ita iha 35 pesoa mak pasa ba iha selesaun dokumentu, ne’ebé mak hatama liuhusi Ministériu Saúde iha Departamentu Planifikasaun. Depois dokumentu hatama hotu la’ós Ministériu Saúde mak halo selesaun ba teste kontínuasaun maibé Ministériu Saúde só fasilita ba halo verifika ba iha dokumentu,” Diretóra Nasionál Rekursu Umanu iha Ministériu Saúde, Mary Christavaria Lopes, hateten ba jornalista sira iha nia kna’ar fatin, ohin.
Nia relata, dokumentu sira-ne’e scan hotu mak haruka ba nasaun Fiji, nune’e sira halo selesaun ikus iha na’in-hitu (7) mak pasa.
“Ita halo scan hotu, depois ita manda diretamente ba iha Fiji, depois parte Fiji mak halo selesaun kontinuasaun. Entaun husi ne’ebá ami simu duni cover leter ne’ebé mak deklara katak pasa husi Fiji nian, vaga ne’ebé mak ami loke, ami iha 12 vaga maibé normalmente ida foin dadauk pasa iha na’in-hitu (7) de’it tuir resposta ne’ebé mak Fiji fó mai ami,” nia dehan.
Nia haktuir, husi na’in-hitu ne’e sira sei ba hasai espesilidade ba iha área sira-ne’ebé mak fó sai husi Ministériu Saúde no mós nasaun Fiji.
“Ita-nia vaga ba psikiatra, Pediatria, Sirujia orál, oftamolojia, Jinekolojia, Medisina Interna, Emerjénsia, dermatolojia, Sirujia jerál no anestesia, entaun iha momentu ne’ebá ita simu resposta. Tanba kestaun tékniku, ita haree katak pasa ne’e vaga ne’ebé ita propoin 12 maibé depois konkordansia entre Fiji ho Timor-Leste deside iha hitu (7) de’it, tanba Fiji mós la simu hotu kandidatu sira. Kandidatu sira tenke konsidera mós husi nasaun balun ne’ebé mak halo mós kompetisaun atu ba iha ne’eba, entaun númeru husi Timor-Leste nia boot entaun númeru relevante sira ita diminui ba hitu (7) de’it,” nia esplika.
Nia informa, ba iha área prinsipál balun hanesan psikiatra antes ne’e Ministériu Saúde públika vaga iha ema na’in-rua (2) maibé ema na’in-rua (2) konserteza ema na’in-ida (1) tenke hela.
“Pediatria mós hanesan iha parte medisina interna, ita iha vaga ida (1) maibé iha momentu ne’ebá ita halo fali redusaun. Tanba vaga hirak mak ita propoin tiha ba Cuba, entaun ita propriedade ba uluk ne’ebá, entaun medisina interna mós ita foti. Obstretika no jenikolojia mós loloos ita iha vaga, maibé iha fiji sira rasik mak reseita tanba iha kandidatu, iha nasaun seluk mós halo kompetisaun iha ne’ebá. Entaun sira konsidera fó fali oportunidade ba Timor-Leste parese tinan oin, dala ruma ita mós bele prepara fali kandidatu iha tinan ida-ne’e, planu fali ba orsamentu tinan oin nian,” nia informa.
Kona prosesu teste bolsa estudu Fiji nian diferensa uitoan ho nasaun Kuba nian, nasaun Fiji nia fó mai parte Ministériu Saúde só halo de’it selesaun ba dokumentu, dokumentu hotu-hotu Ministériu Saúde halo scan depois manda tuir email ba tiha Fiji depois sira mak halo selesaun kontinuasaun.
“Kandidatu sira halo aplikasaun ne’e online ho Fiji, depois Fiji mak fó resposta ida ho ami-nia ekipa juri. Ami só atu halo selesaun dokumentu de’it, maibé kontínua no resposta ba halo ami iha fokal point daudaun ne’e, ami DJ korporativu sira halo kordenasaun diretamente,” nia dehan.
Jornalista : Felicidade Ximenes
Editór : Cancio Ximenes
